قلات: (دنیا نیوز) قلات کے علاقہ توغہ چھپر میں نامعلوم مسلح افراد کی لیویز چوکی پر فائرنگ سے ایک اہلکار شہید جبکہ دو شدید زخمی ہو گئے۔
لیویز ذرائع کے مطابق زخمیوں کو ڈی ایچ کیو ہسپتال قلات میں طبی امداد کے بعد کوئٹہ منتقل کردیاگیا جہاں ان کا علاج معالجہ جاری ہے۔
ذرائع کا مزید بتانا ہے کہ لیویز جوانوں کی جوابی کارروائی سے مسلح افراد موقع سے فرار ہوگئے، واقعہ کی اطلاع ملتے ہی لیویزفورس کی بھاری نفری موقع پر پہنچ گئی اور ملزمان کی تلاش شروع کردی۔
دہشتگردوں کے ناپاک عزائم کو کامیاب نہیں ہونے دیں گے: وزیراعظم
وزیراعظم شہباز شریف نے قلات میں لیویز پوسٹ پر دہشتگردانہ حملے کی مذمت کی اور حملے میں شہید ہونے والے اہلکار علی نواز کو خراج عقیدت پیش کیا، وزیرِ اعظم نے شہید کی بلندی درجات اور اہل خانہ کیلئے صبر جبکہ حملے میں زخمی ہونے والے اہلکاروں کی جلد صحت یابی کی دعا کی۔
وزیراعظم شہبازشریف کا کہنا تھا کہ دہشتگرد بلوچستان کی تعمیر و ترقی کے دشمن ہیں، دہشتگردوں کے ناپاک عزائم کو کامیاب نہیں ہونے دیں گے، لیویز اہلکار نے وطن کی حفاظت کی خاطر اپنی جان کا نذرانہ پیش کیا، وطن کے امن کی خاطر جان قربان کرنے والے علی نواز شہید کو سلام پیش کرتے ہیں۔
لیویز اہلکار کی قربانی کو سلام پیش کرتے ہیں: وفاقی وزیر داخلہ
وفاقی وزیرداخلہ محسن نقوی نے لیویز پوسٹ پر دہشتگردوں کے حملے کی مذمت کی اور شہید لیویز اہلکار علی نواز کو خراج عقیدت پیش کیا، محسن نقوی نے شہید لیویز اہلکار علی نواز کے اہل خانہ سے دلی ہمدردی و اظہار تعزیت کیا اور زخمی ہونے والے 2 لیویز اہلکاروں کی جلد صحتیابی کیلئے دعا کی۔
اس حوالے سے وزیر داخلہ محسن نقوی نے کہا کہ دہشتگردوں کا بہادری سے مقابلہ کرتے ہوئے شہید ہونے والے لیویز اہلکار علی نواز کی قربانی کو سلام پیش کرتے ہیں، لیویز اہلکار علی نواز نے فرض کی ادائیگی کے دوران جان قربان کرکے شہادت کا اعلیٰ مرتبہ پایا، شہید لیویز اہلکار علی نواز نے اپنی قیمتی جان وطن کے امن کے لئے قربان کی۔
