وقار ذکا نے ندا یاسر کو مارننگ شو کی بجائے انوکھا کام کرنے کا مشورہ دے دیا

Published On 26 November,2023 10:31 pm

لاہور: (ویب ڈیسک) معروف ٹی وی میزبان وقار ذکا نے ندایاسر کو مارننگ شو کی بجائے کارٹون شو کرنے کا مشورہ دیدیا۔

ندا یاسر نے حال ہی میں نجی ٹی وی چینل کے پروگرام میں گفتگو کرتے ہوئے کہا تھا کہ وقار ذکا نے اُنہیں مارننگ شو “گُڈ مارننگ پاکستان”سے نکلوانے کے لیے اُن کے خلاف مہم چلائی،اُنہیں میزبانی سے ہٹانے کے لیے بہت کوشش کی۔

اُن کا کہنا تھا کہ وقار ذکا نے اُنہیں مارننگ شو کی میزبانی سے ہٹانے کے لیے چینل کے مالکان کو ای میل بھی کی تھی، ندا یاسر نے یہ بھی کہا تھا کہ وقار ذکا کے ساتھ اُن کی کافی اچھی دوستی تھی لیکن پھر بھی وقار نے دشمنی نکالی۔

ندا یاسر کا یہ ویڈیو کلپ جیسے ہی سوشل میڈیا پر وائرل ہوا تو وقار ذکا نے بھی سماجی رابطے کی ویب سائٹ ایکس (سابق ٹوئٹر) پر اپنے ویڈیو بیان میں سخت ردعمل دیا جس میں وقار ذکا نے کہا کہ “ندا یاسر کو ریٹنگ چاہیے اور دوبارہ سے سُرخیوں میں آنا ہے، اسی لیے وہ میرے خلاف باتیں کررہی ہیں”۔

وقار ذکا نے ماضی کی بات دہراتے ہوئے کہا کہ “سال 2020 میں ندا یاسر نے جنسی زیادتی کا شکار ہونے والی بچی کے والدین کو اپنے مارننگ شو میں مدعو کیا تھا جوکہ بالکل مناسب نہیں تھا”۔

اُنہوں نے کہا کہ “مارننگ شو کے بارے میں کہا جاتا ہے کہ جب تک مہمان روئے گا نہیں تب تک شو کی ریٹنگ نہیں آئے جبکہ جتنے بھی شوز ہوتے ہیں اُن کے تمام فیصلے میزبان ہی کرتا ہے، میزبان کی مرضی کے بغیر کوئی مہمان شو میں نہیں آتا”۔

وقار ذکا نے کہا کہ ندا یاسر عُمر میں مجھ سے بڑی ہیں، میں دل سے اُن کی عزت کرتا ہوں لیکن مجھے لگتا ہے کہ اُنہیں اب مارننگ شو کی میزبانی ختم کرکے چینل پر کوئی کارٹون شو شروع کردینا چاہیے۔ 

Advertisement