ممبئی: (ویب ڈیسک) بھارت کی کناڈا فلموں کی اداکارہ رانیا راؤ نے انکشاف کیا ہے کہ سونا سمگل کرنے کا طریقہ یوٹیوب سے سیکھا۔
بھارتی میڈیا کے مطابق چند روز قبل اداکار رانیا راؤ کو 12 کروڑ56 لاکھ بھارتی روپے کی مالیت کے 14.2 کلو گرام سونا سمگل کرنے کے الزام میں گرفتار کیا گیا تھا۔
بھارتی میڈیا نے بتایا کہ دوران حراست ڈائریکٹوریٹ آف ریونیو انٹیلی جنس (ڈی آر آئی) کی جانب سے کی گئی پوچھ گچھ کے دوران رانیا راؤ نے انکشاف کیا کہ مجھے دبئی انٹرنیشنل ایئرپورٹ کے ٹرمینل 3 کے گیٹ اے سے سونا لینے کے لئے بذریعہ انٹرنیٹ کال موصول ہوئی تھیں۔
ان کا مزید کہنا تھا کہ اس سفر سے 2 ہفتے قبل ہی غیر ملکی نمبرز سے کال آرہی تھی جس کے بعد میں نے پہلی بار سونا سمگل کیا، اداکارہ نے بتایا کہ مجھے ایئرپورٹ کے ڈائننگ لاؤنج میں سفید گاؤن میں ملبوس ایک نامعلوم شخص نے دو پیکٹ دیئے تھے جبکہ میں نے سونا چھپانے کا طریقہ یوٹیوب سے سیکھا تھا۔
بھارتی میڈیا کے مطابق ایئرپورٹ پر رانیا راؤ نامعلوم شخص سے سونا لینے کے بعد اسے واش روم میں لے گئیں، بعد ازاں اداکارہ نے کپڑوں میں سونے کی سلاخیں (ٹیپ سے چپکا کر) سونا سمگل کرنے کی کوشش کی تھی، رانیا نے اپنے جوتوں اور جیبوں میں بھی سونے کے چھوٹے ٹکڑے چھپا رکھے تھے۔
یاد رہے کہ رانیا راؤ فلم مانکیا میں کناڈا سپر سٹار سدیپ کے مدمقابل کردار نبھانے کیلئے مشہور ہیں۔
