لاہور: (ویب ڈیسک) پاکستان شوبز انڈسٹری کی معروف اداکارہ حبا بخاری نے ایک جعلی ایکس (سابقہ ٹوئٹر) اکاؤنٹ کی جانب سے ان سے منسوب کیے گئے متنازع بیان پر ردعمل دیتے ہوئے وضاحت پیش کی ہے کہ ان کا کوئی آفیشل ٹوئٹر اکاؤنٹ نہیں ہے۔
گزشتہ دنوں سوشل میڈیا پر ایک اکاؤنٹ نے سابق وزیراعظم عمران خان سے متعلق ایک بیان حبا بخاری کے نام سے شیئر کیا تھا جس پر صارفین کی جانب سے مختلف ردعمل سامنے آیا۔
حبا بخاری نے اپنے انسٹاگرام اکاؤنٹ پر سٹوری کے ذریعے اپنے مداحوں کو آگاہ کیا کہ وہ ایکس (ٹوئٹر) پر موجود نہیں ہیں اور ان کے نام سے چلنے والا اکاؤنٹ جعلی ہے۔
اداکارہ نے اپنے مداحوں سے درخواست کی کہ ایسے جعلی اکاؤنٹس کو فوراً رپورٹ کریں تاکہ غلط معلومات کے پھیلاؤ کو روکا جا سکے۔
اداکارہ نے مزید کہا ہے کہ ان کے نام سے کسی بھی سماجی یا سیاسی معاملے پر کیے جانے والے بیانات کو سنجیدگی سے نہ لیا جائے جب تک کہ وہ خود اپنے آفیشل پلیٹ فارمز پر کوئی بات نہ کریں، حبا بخاری کی اس وضاحت کے بعد مداحوں میں پائی جانے والی غلط فہمی دور ہو گئی ہے۔
