اسلام آباد: (دنیا نیوز) وفاقی وزیر برائے غذائی تحفظ رانا تنویر حسین نے چینی کی قیمتوں میں اضافے کی خبروں کو بے بنیاد قرار دے دیا۔
چینی کی قیمتوں کے حوالے سے گفتگو کرتے ہوئے وفاقی وزیر رانا تنویر حسین کا کہنا تھا کہ اسحاق ڈار کی زیر صدارت کمیٹی تشکیل دی گئی ہے جو چینی کی قیمتوں کی نگرانی کر رہی ہے، چینی کی قیمتوں میں کوئی اضافہ نہیں ہوا۔
انہوں نے کہا کہ چینی180روپے کلوفروخت ہونے کی خبر بے بنیاد ہے، مارکیٹ میں چینی کی قیمت 162 روپے فی کلو جبکہ یوٹیلیٹی سٹورز پر 153 روپے فی کلو میں دستیاب ہے۔
ان کا کہنا تھا کہ قیمتیں بڑھنے کا تاثر بالکل مناسب نہیں ہم مذمت کرتے ہیں، حکومت نے چینی کی قیمتوں پر قابو پانے کیلئے ایکشن لیا ہے اور کسی کو قیمتوں میں غیر ضروری اضافہ کرنے کی اجازت نہیں دی جائے گی۔
وفاقی وزیر رانا تنویر نے ذخیرہ اندوزوں کے خلاف سخت کارروائی کا اعلان کرتے ہوئے کہا کہ حکومت صوبوں کے ساتھ مل کر اس مسئلے پر کام کر رہی ہے تاکہ عوام کو سستی اور وافر مقدار میں چینی کی فراہمی یقینی بنائی جا سکے، عوام سے بھی اپیل ہے کہ چینی کی قیمتوں میں اضافے سے متعلق افواہوں پر یقین نہ کریں۔
