اسلام آباد: (دنیا نیوز) ملک کے مختلف 12 اضلاع کے ماحولیاتی نمونوں میں پولیو وائرس کی تصدیق ہوئی ہے۔
این سی او سی حکام کے مطابق ملک کے 14 اضلاع سے 15سیمپلز اکٹھے کیے گئے تھے، تمام اضلاع سے ماحولیاتی نمونے 17 سے 26 فروری کے دوران جمع کیے گئے تھے، ملتان، بہاولپور، لاہور، ڈی جی خان اور قصور کے ماحولیاتی نمونوں میں پولیو وائرس کی تصدیق ہوئی۔
حکام کی جانب سے بتایا گیا کہ ڈیرہ بگٹی، لسبیلہ، کوئٹہ، سبی، جنوبی وزیرستان کے ماحولیاتی نمونوں میں پولیو وائرس پایا گیا جبکہ چارسدہ، صوابی کے ماحولیاتی نمونوں میں بھی پولیو وائرس کی تصدیق ہوئی جبکہ ڈی آئی خان اور شمالی وزیرستان کے ماحولیاتی نمونوں میں پولیو وائرس کی تصدیق نہیں ہوئی۔
این سی او سی حکام نے بتایا کہ کراچی کی 59 یونین کونسلز میں 16 مارچ تک پولیو مہم جاری رہے گی جبکہ 21 سے 27 اپریل تک ملک گیر انسداد پولیو مہم کا آغاز ہو گا، مہم میں 4 کروڑ 54 لاکھ سے زائد بچوں کو پولیو سے بچاؤ کے قطرے پلانے کا ہدف ہے۔
