اسلام آباد: (دنیا نیوز) وزیراعظم شہباز شریف نے کہا ہے کہ پاکستان میں ہیپا ٹائٹس سی بہت تیزی سے پھیل رہا ہے، اسلام آباد میں جناح میڈیکل سینٹر کا آغاز کرنے جا رہے ہیں، یہ پاکستان میں دوسرا جان ہاپکنز ہوگا۔
گلگت بلتستان میں انسداد ہیپاٹائٹس سی کے پائلٹ پراجیکٹ کی کامیاب تکمیل پر وزیراعظم ہاؤس میں منعقدہ تقریب سے خطاب کرتے ہوئے وزیراعظم شہباز شریف کا کہنا تھا کہ جس طرح پاکستان کڈنی اینڈ لیور ٹرانسپلانٹ انسٹیٹیوٹ (پی کے ایل آئی) کے حوالے سے ہمارا خواب ڈاکٹر سعید اختر سمیت تمام شراکت داروں نے ملکر شرمندہ تعبیر کیا، اب انشا اللہ جناح میڈیکل سینٹر کو بھی اسی طرح ہم تیزی سے آگے لیکر جا رہے ہیں، اس کی پلاننگ کا کام مکمل ہوچکا ہے۔
انہوں نے کہا کہ پنجاب میں ہیپاٹائٹس کے علاج کے حوالے سے پہلے پی کے ایل آئی کے تحت یونٹ بنائے گئے، مریضوں کیلئے مفت تشخیص اور دوائیں دینے کا سلسلہ شروع کیا گیا، آج بھی یہ پروگرام صوبہ پنجاب میں جاری ہے، تاہم ماضی میں ہماری حکومت کو ہٹوا کر آنے والی حکومت نے اس پروگرام کا خاتمہ کر کے ہیپاٹائٹس کو صرف جنرل ہسپتالوں تک علاج کیلئے محدود کر دیا تھا۔
ان کا کہنا تھا کہ ہیپاٹائٹس سی کے حوالے سے جو ذمہ داری گلگت بلتستان کے وزیراعلیٰ اور ان کی حکومت نے سنبھالی ہے، اور وفاقی حکومت کے ساتھ ملکر اس کے خاتمے کیلئے وہاں جو اقدامات شروع کیے گئے ہیں، میں ان پر وزیر صحت مصطفیٰ کمال اور ان کی ٹیم، وزیر منصوبہ بندی احسن اقبال اور آغا خان فاؤنڈیشن کے علاوہ عالمی ادارہ صحت کا شکریہ ادا کرتا ہوں۔
وزیراعظم نے کہا کہ وزیرصحت مصطفیٰ کمال، وزیر منصوبہ بندی احسن اقبال سمیت جن جن لوگوں کو آج شیلڈز دی گئی ہیں، وہ پاکستان کے حقیقی ہیروز ہیں، جنہوں نے گلگت بلتستان میں ہیپاٹائٹس کے خاتمے کیلئے کام کیا ہے۔
شہباز شریف کا مزید کہنا تھا کہ مصطفیٰ کمال نے شہر قائد کیلئے بہت کام کیا، ان کی محنت اور لگن کو مد نظر رکھتے ہوئے انہیں محکمہ صحت کی ذمہ داری دی تاکہ عوام کو درپیش صحت کے مسائل کے حل کیلئے بھی وہ بطور وزیر صحت عوام کیلئے بہترین خدمات انجام دیں۔
تقریب سے خطاب کرتے ہوئے وفاقی وزیر احسن اقبال نے کہا کہ ہیپاٹائٹس سی کے حوالے سے پاکستان دنیا میں پہلے نمبر پر ہے، صحت کا شعبہ پاکستان کیلئے بڑا چیلنج ہے، 2030 تک ہیپاٹائٹس سی جیسی بیماری سے چھٹکارا حاصل کر لیں گے۔
ان کا کہنا تھا کہ ہیپاٹائٹس سی کے مرض کے خاتمے کیلئے مصنوعی ذہانت کا استعمال کریں گے۔
اس موقع پر وفاقی وزیر صحت مصطفیٰ کمال نے کہا کہ صحت کے شعبے میں بہتری آ رہی ہے، بطور ٹیم وزیراعظم کی توقعات پر پورا اتر کر دکھائیں گے۔
