لاہور: (دنیا نیوز) وزیراعلی پنجاب کی معاون خصوصی اطلاعات ڈاکٹر فردوس عاشق اعوان نے اعلان کیا ہے کہ مینار پاکستان پر ثقافتی ورثے کا نقصان پی ڈی ایم سے وصول کیا جائے گا بدقسمت پی ڈی ایم کیجانب سے عوام کیساتھ کسی بھلائی کی توقع نہیں۔
اپنے ٹویٹ میں ڈاکٹر فردوس عاشق اعوان نے کہا کہ دور دراز سے آئے جلسے کے شرکا کو اپوزیشن نے بدلے میں صرف کورونا ہی دیا، بزدار حکومت اپنے شہریوں کی ہرممکن دیکھ بھال کریگی۔ جلسے کی آڑ میں ثقافتی ورثہ کو پہنچے والے نقصان کی وصولی پی ڈی ایم سے کی جائیگی۔
لاہوریوں کی جلسے سے لاتعلقی نے ثابت کیا کہ راجکماری نے ظلِ سبحانی کی سیاست کو زمیں بوس کردیا. PDMقیادت کی موجودگی میں غیور لاہوریوں سے متعلق محمود اچکزئی کی بدزبانی پر تمام اپوزیشن کو معافی مانگنی چاہئے!
— Dr. Firdous Ashiq Awan (@Dr_FirdousPTI) December 14, 2020
ڈاکٹر فردوس عاشق اعوان نے کہا کہ لاہوریوں کی جلسے سے لاتعلقی نے ثابت کیا کہ راجکماری نے ظلِ سبحانی کی سیاست کو زمیں بوس کردیا۔ پی ڈی ایم قیادت کی موجودگی میں غیور لاہوریوں سے متعلق محمود خان اچکزئی کی بدزبانی پر تمام اپوزیشن کو معافی مانگنی چاہئے۔
