اسلام آباد:(دنیا نیوز) اپوزیشن قیادت نے بڑا فیصلہ کر لیا، قومی اسمبلی اجلاس میں پاکستان تحریک انصاف (پی ٹی آئی) کے رکن خیال زمان کی وفات پر فاتحہ خوانی کی روایت برقرار رکھی جائے گی، شہباز شریف اور مولانا فضل الرحمان سے آصف زرداری اور بلاول بھٹو کی ملاقات میں تحریک عدم اعتماد پر مشاورت کی گئی۔
ذرائع کے مطابق پاکستان مسلم لیگ (ن) کے صدر اور قومی اسمبلی میں قائد حزب اختلاف شہباز شریف، پی ڈی ایم کے سربراہ مولانا فضل الرحمان سے آصف زرداری اور بلاول بھٹو کی ملاقات ہوئی ہے جس میں فیصلہ کیا گیا کہ پی ٹی آئی رکن خیال زمان کی وفات پر فاتحہ خوانی کی روایت برقرار رکھی جائے گی، فاتحہ خوانی کے بعد اپوزیشن کی تحریک عدم اعتماد کی قرارداد پیش ہوگی۔
اس حوالے سے ذرائع کا مزید بتانا تھا کہ اپوزیشن کی جانب سے قائد حزب اختلاف شہباز شریف عدم اعتماد کی قرارداد پیش کریں گے، اپوزیشن کے 162 میں سے 161 ارکان پورے کرنے کی ذمہ داری تمام جماعتوں کے سربراہوں پر ہوگی، اپوزیشن کا ایک رکن علی وزیر جیل میں ہے۔
ذرائع کا کہنا ہے کہ علی وزیر کی اجلاس میں شرکت کیلئے پروڈکشن آرڈر جاری نہیں کئے گئے، اپوزیشن کی جانب سے علی وزیر کے پروڈکشن آرڈر کیلئے سپیکر کو درخواست دی جائے گی۔
ذرائع کے مطابق قومی اسمبلی میں قائد حزب اختلاف شہباز شریف کی صدارت میں اپوزیشن رہنماؤں کا اہم اجلاس ہوا، اجلاس میں بلاول بھٹو ، آصف علی زرداری، مولانا فضل الرحمان، شاہد خاقان عباسی، احسن اقبال، سعد رفیق، خواجہ آصف ودیگر شریک ہوئے۔
آصف علی زرداری اور بلاول بھٹو زرداری کے ہمراہ شیری رحمان اور رخسانہ بنگش بھی موجود تھیں، آصف علی زرداری، بلاول بھٹو زرداری، شہباز شریف اور مولانا فضل الرحمان کے درمیان تحریک عدم اعتماد اور اسمبلی اجلاس سے متعلق حکمت عملی پر غور کیا گیا۔
ادھر متحدہ اپوزیشن نے پارلیمانی اجلاس آج صبح طلب کرلیا ہے، اپوزیشن ارکان اسمبلی کا اجلاس صبح 10 بجے پارلیمنٹ میں ہو گا، میٹنگ میں قومی اسمبلی اجلاس بارے حکمت عملی مرتب دی جائے گی، حکومت اور سپیکر کیخلاف ممکنہ احتجاج بارے مشاورت بھی ہو گی۔
پی پی کی پارلیمانی پارٹی بیٹھک، قومی اسمبلی اجلاس کی حکمت عملی پر مشاورت
سابق صدر آصف علی زرداری اور پاکستان پیپلز پارٹی (پی پی پی) کے چیئرمین بلاول بھٹو کے زیر صدارت پیپلز پارٹی کی پارلیمانی پارٹی کا اجلاس ہوا جس میں قومی اسمبلی کے آج کے اجلاس کی حکمت عملی پر مشاورت کی گئی۔
آصف علی زرداری اور پاکستان پیپلزپارٹی کے چیئرمین بلاول بھٹو زرداری کی سربراہی میں پاکستان پیپلزپارٹی پارلیمنٹرینز کی پارلیمانی پارٹی کا اہم اجلاس زرداری ہاؤس میں ہوا۔
پاکستان پیپلزپارٹی پارلیمنٹرینز کی پارلیمانی پارٹی کے اجلاس میں پی پی پی سے تعلق رکھنے والے تمام اراکین قومی اسمبلی نے شرکت کی ، سابق صدرِ مملکت آصف علی زرداری اور چیئرمین بلاول بھٹو زرداری نے اراکین پارلیمان کو قومی اسمبلی کے اجلاس کے حوالے سے اہم ہدایات دیں۔
اجلاس میں آصف علی زرداری اور چیئرمین بلاول بھٹو زرداری نے پی پی پی پی اراکین پارلیمان کو تحریک عدم اعتماد کے حوالے سے بھی اہم ہدایات دیں۔
