اسلام آباد: (دنیا نیوز) رہنما مسلم لیگ ن طلال چودھری نے کہا کہ ہم تو مارشل لا سے نہیں ڈرے الیکشن سے کیا ڈریں گے۔
مسلم لیگ ن کے رہنما طلال چودھری نے پریس کانفرنس کرتے ہوئے کہا کہ ہم الیکشن سے نہیں دوڑ رہے، عمران خان نے اسمبلی توڑنی ہے تو پہلے اعتماد کا ووٹ لیں، قوم کو 186 ارکان دکھا دیں اور اگلے منٹ میں اسمبلی توڑ دیں۔
انہوں نے کہا کہ چودھری پرویزالہیٰ ، چودھری شجاعت حسین کے نہیں بنے عمران کےکیا بنیں گے، پنجاب میں پرویزالہیٰ اپنے بیٹے کراؤن پرنس کے ساتھ مل کر دیہاڑیاں لگا رہے ہیں، صرف ایک نجی سوسائٹی میں چار بلین کی ڈیل ہوئی ہے جس کا علم عمران خان کو بھی ہے۔
طلال چودھری نے کہا کہ قانون کا اطلاق تمام پارٹیوں کے سربراہان پر ایک جیسا ہونا چاہیے،عمران خان نے آئی فون کا صرف 20 فیصد دے کرخریدا، ساری چوریاں کر کے خود کو صادق اور امین کہتے ہیں۔
رہنما مسلم لیگ ن نے کہا کہ جس آدمی نے اپنے بچے شو نہیں کیے وہ پاکستان میں احتساب چاہتا ہے، عمران خان کا وکیل عدالت میں بہانے بنا رہا ہے، وکیل بتائے بچی عمران کی ہے یا نہیں، عدالت میں تمہاری نہیں قانون کی مرضی چلے گی۔
طلال چودھری نے کہا کہ مرشد، مرید اور ان کے چیلوں کی کہانیاں عجیب ہیں، مرشد اپنے شوہر کے عہدے کا سودا کرتی رہیں، توشہ خانہ میں صرف ڈاکہ نہیں ڈالا نئے ورلڈ ریکارڈ بنائے گئے، چھ ارب کی چیزوں کو چند ہزار میں لے لیا گیا۔
پریس کانفرنس میں انہوں نے مزید کہا کہ لندن کے تین فلیٹس حلال کی کمائی سے کئی برسوں بعد بنائے گئے، نواز شریف کو بچوں سے تنخواہ نہ لینے پر تاحیات نااہل کیا گیا۔
