اسلام آباد: (ویب ڈیسک) وزیر مملکت اور پاکستان پیپلز پارٹی کے مرکزی سیکرٹری اطلاعات فیصل کریم کنڈی نے کہا ہے کہ عمران خان کتنے باعزت ہیں، نشاندہی کے لئے ریحام خان کی کتاب کافی ہے۔
عمران خان کی صحافیوں سے گفتگو پر ردعمل کا اظہار کرتے ہوئے وزیر مملکت کا کہنا تھا کہ عمران خان کی کیا عزت ہو سکتی ہے کہ وہ اپنی بیٹی کو بھی بیٹی نہیں مانتا، اس شخص نے دوست ممالک کے سربراہان کی طرف سے دئیے ہوئے تحفے بیچ دئیے، کوئی باعزت شخص تو دوستوں کے دئیے ہوئے تحفے نہیں بیچتا۔
فیصل کریم کنڈی نے کہا کہ آصف علی زرداری کی دنیا میں عزت ہے، انہوں نے دہشت گردوں سے مزاحمت کی، آصف علی کا سیاست میں بلند مقام ہے، انہوں نے 1973ء کا آئین بحال کیا، انہوں نے گلگت بلتستان کے عوام کو شناخت دی۔
انہوں نے کہا کہ عمران خان کی عزت یہ تھی کہ ایک ملک کے حکمران نے انہیں اپنے جہاز سے اتار دیا تھا، عمران نیازی پاکستان کے واحد وزیراعظم تھے جو سفارتی استثنیٰ کی پناہ میں امریکہ جاتے تھے۔
