عون چودھری کا پی ٹی آئی پر پابندی کیلئے سپریم کورٹ سے رجوع

Published On 06 July,2023 12:50 pm

اسلام آباد: (دنیا نیوز) وزیراعظم شہباز شریف کے مشیر اور استحکام پاکستان پارٹی کے ایڈیشنل سیکرٹری جنرل عون چودھری نے پاکستان تحریک انصاف (پی ٹی آئی) پرپابندی کے لیے سپریم کورٹ میں درخواست دائر کر دی۔

چیئرمین پی ٹی آئی کے سابق پرسنل سیکرٹری عون چودھری نے تحریک انصاف پر پابندی کے لیے ذاتی حیثیت میں سپریم کورٹ میں پٹیشن دائر کی ہے۔

درخواست میں پی ٹی آئی پر ریاست اور ملکی اداروں کیخلاف سرگرمیوں کا الزام عائد کیا گیا ہے، درخواست میں پی ٹی آئی کی خلاف قانون سرگرمیوں کو پابندی کیلئے جواز بنایا گیا۔

عون چودھری کی جانب سے درخواست میں استدعا کی گئی ہے کہ پی ٹی آئی قیادت کی جانب سے قومی اداروں اور شہدا کی یادگاروں پر حملوں کے باعث پابندی عائد کی جائے۔

دوسری جانب ذرائع نے بتایا ہے کہ استحکام پاکستان پارٹی کا موقع ہے کہ پاکستان تحریک انصاف (پی ٹی آئی) پر پابندی کیلئے الیکشن کمیشن بھی جائیں گے۔

Advertisement