لاہور: (دنیا نیوز) وزیراعلیٰ پنجاب محسن نقوی نے لاہور کی مرکزی شاہراہ قائد اعظم (مال روڈ) کو ڈسٹ فری ماڈل روڈ بنانے کی منظوری دے دی۔
نگران وزیراعلیٰ پنجاب کی زیر صدارت اجلاس میں فیصلہ کیا گیا کہ صوبائی دارالحکومت لاہورکی مرکزی شاہراہ مال روڈ کو ڈسٹ فری ماڈل روڈ بنایا جائے گا۔
مال روڈ کے اطراف اور گرین بیلٹ میں گھاس لگائے جانے کے علاوہ درختوں کی تعداد میں بھی اضافہ کیا جائے گا۔
اجلاس میں فیصلہ کیا گیا کہ شہر میں بارش کے پانی کو محفوظ رکھنے کیلئے نئے واٹر ٹینکس بنائے جائیں گے، تاجروں کی مشاورت سے مال روڈ پر یکساں اور خوبصورت سائن بورڈ لگائے جائیں گے۔
فیصلے کے مطابق مال روڈ سے تجاوزات کاخاتمہ کرنے کے علاوہ پارکنگ کے نظام کو بہترین بنایا جائے گا، مال روڈ پر صفائی کے انتظامات دنیا کے بہترین شہروں کے معیار کے مطابق ہوں گے۔
نگران وزیراعلیٰ پنجاب محسن نقوی نے مال روڈ کو ڈسٹ فری ماڈل روڈ بنانے کے حوالے سے چند روز میں حتمی پلان طلب کر لیا ہے۔
اجلاس میں سیکرٹری وزیراعلیٰ، ڈپٹی کمشنر لاہور، ڈی جی پی ایچ اے اور چیف ایگزیکٹو آفیسر لاہور ویسٹ مینجمنٹ کمپنی نے شرکت کی۔
