کابینہ کی سٹینڈنگ کمیٹی برائے انسداد سموگ کا اجلاس آج طلب، اہم فیصلے متوقع

Published On 30 November,2023 12:57 pm

لاہور: (دنیا نیوز) نگران وزیراعلیٰ پنجاب محسن نقوی نے سموگ کی صورتحال کے پیش نظر کابینہ کی سٹینڈنگ کمیٹی برائے انسداد سموگ کا اجلاس آج طلب کر لیا۔

محسن نقوی کی زیر صدارت ہونے والے اجلاس میں سموگ کی صورتحال کا جائزہ لیا جائے گا، سموگ کی بگڑتی صورتحال کے پیش نظر اجلاس میں اہم فیصلے متوقع ہیں۔

ذرائع کے مطابق سموگ کی روک تھام کیلئے صوبائی محکموں نے سافٹ سموگ لاک ڈاؤن کی تجویز تیار کر لی ہے، جمعہ کو سکول، کالج، یونیورسٹیز جبکہ ہفتے کے روز مارکیٹیں، جم، سینما اور فیکٹریاں بند کرنے کی تجاویز ہیں۔

ذرائع کا کہنا ہے کہ سموگ میں کمی لانے کیلئے ہفتے کے روز ریسٹورینٹس بھی بند کرنے کی تجویز پیش کی گئی ہے۔

کابینہ کی سٹینڈنگ کمیٹی برائے انسداد سموگ کے اجلاس میں صوبائی وزراء، چیف سیکرٹری، انسپکٹر جنرل پولیس، ماہرین ماحولیات و صحت، سیکرٹریز اور دیگر متعلقہ حکام شرکت کریں گے۔

 

Advertisement