پشاور: (دنیا نیوز) ملک بھر میں قیام پذیر افغان مہاجرین کو ڈی پورٹ کرنے کی تیاریاں مکمل کر لی گئیں۔
محکمہ داخلہ پشاور کے مطابق 260 غیر قانونی افغان باشندوں کو مختلف شہروں سے آج خیبرپختونخوا پہنچایا جائے گا، کاغذی کارروائی مکمل کرنے کے بعد آج ہی طورخم بارڈر سے ڈی پورٹ کیا جائے گا۔
صوبائی محکمہ داخلہ کے مطابق 41 افغان باشندے اوکاڑہ سے جبکہ 46 ساہیوال سے لائے جائیں گے، 47 بہاولپور ،54 رحیم یار خان اور 18 ننکانہ سے منتقل کئے جائیں گے، 17 افغانیوں کو مظفرگڑھ اور 37 کو حافظ آباد سے ہولڈنگ کیمپس منتقل کیا جائے گا۔
دوسری جانب لاہور سے پہلے فیز میں 35 تارکین وطن کو ڈی پورٹ کرنے کی تیاریاں مکمل کر لی گئیں، ضلعی انتظامیہ نے رپورٹ محکمہ داخلہ کو بھجوا دی۔
ذرائع کے مطابق پولیس ،ایف آئی اے اور نادرا کی رپورٹ کے بعد ضلعی انتظامیہ نے تارکین وطن کی رپورٹ جاری کر دی، پولیس کی طرف سے 340 تارکین وطن کا ڈیٹا ضلعی انتظامیہ کے حوالے کیا گیا، ضلعی انتظامیہ نے تارکین وطن کا ڈیٹا ایف آئی اے اور نادرا سے چیک کروا لیا۔
ذرائع کے مطابق 305 تارکین کو پروف آف ریزیڈینس کی بنیاد پر پاکستان رہنے کی اجازت دی گئی ہے۔
ضلعی انتظامیہ نے 35 تارکین وطن کو ڈی پورٹ کرنے کی رپورٹ محکمہ داخلہ پنجاب کو بھجوا دی، جو افغان تارکین وطن کو ڈی پورٹ کرنے کے احکامات دے گا۔
