گوادر: (ویب ڈیسک) وزیراعلیٰ بلوچستان میر سرفراز بگٹی نے کہا ہے کہ صوبے میں امن و امان کی بحالی اور عوام کے جان و مال کے تحفظ کے لیے سول و ملٹری ادارے بھرپور کردار ادا کر رہے ہیں۔
وزیراعلیٰ بلوچستان سرفرازبگٹی نے گوادر میں جشنِ آزادی کے حوالے سے منعقدہ ایک پروقار تقریب سے خطاب کرتے ہوئے کہا کہ ماضی میں احتجاج کے نام پر بلوچستان کی سڑکیں گھنٹوں اور دنوں تک بند رہتی تھیں لیکن آج ایسی صورتحال کا خاتمہ ہو چکا ہے اس ضمن میں کمانڈر 12 کور کا شکریہ ادا کرتے ہیں۔
سرفراز بگٹی نے کہا کہ عوام سے وعدہ ہے کہ اپنی مضبوط فوج، فرنٹیئر کور، لیویز اور پولیس کی مدد سے صوبے میں مکمل امن قائم کیا جائے گا اور وہ دن دور نہیں جب بلوچستان میں امن کا سورج پوری آب و تاب سے چمکے گا۔
وزیراعلیٰ نے کہا کہ ایک وقت میں ساحلی شاہراہ پر کراچی سے تربت کا سفر خطرناک سمجھا جاتا تھا مگر آج حالات بہتر ہو چکے ہیں اور ماضی کی طرح ہم ہر چیلنج پر قابو پانے کی صلاحیت رکھتے ہیں۔
انہوں نے زور دیا کہ ریاست اور عوام کے درمیان فاصلے ختم کرنے کے لئے ترقیاتی منصوبوں کو حقیقت پسندانہ بنیادوں پر استوار کرنا، ملازمتوں میں میرٹ کو یقینی بنانا اور گورننس کے معیار کو بہتر بنانا ناگزیر ہے۔
وزیراعلیٰ نے عوام سے اپیل کی کہ وہ جھوٹے پراپیگنڈے اور گمراہ کن بیانیے میں نہ آئیں، انہوں نے کہا کہ پاکستان کو کمزور یا تقسیم کرنے کی تمام کوششیں چاہے وہ طاقت کے زور پر نظریہ مسلط کرنے کی ہوں، سماجی اثر و رسوخ کے منفی استعمال پر مبنی ہوں یا جلسے جلوس کے ذریعے انتشار پیدا کرنے کی ہوں ماضی میں ناکام ہوئیں اور آئندہ بھی ناکام ہی رہیں گی۔
وزیراعلیٰ بلوچستان نے واضح کیا کہ بلوچ کسی لاحاصل جنگ کا حصہ نہیں ہیں، پاکستان کو کوئی طاقت توڑ نہیں سکتی اور یہ ملک تا قیامت مضبوط و قائم رہے گا۔
