قصور، بہاولنگر: (دنیا نیوز) دریائے ستلج میں پانی کی سطح بلند ہونے سے ملحقہ اضلاع میں سیلابی صورت حال پیدا ہو گئی، درجنوں دیہات زیر آب آ چکے ہیں جبکہ ایک نوجوان بھی دریا میں گر گیا، پنجاب میں آج سے بارشوں کی پیشگوئی بھی کی گئی ہے۔
بھارت کی جانب سے دریائے ستلج میں پانی چھوڑے جانے کے بعد پانی کی سطح میں اضافے کے باعث پاکستانی علاقوں میں سیلابی صورتحال کا سامنا ہے۔
فلڈ وارننگ سینٹر کے مطابق گنڈا سنگھ والا پر درمیانے درجے کے سیلاب کے پیش نظر قصور، اوکاڑہ اور پاکپتن میں دریا کے کنارے قائم آبادیوں سے شہریوں کو محفوظ مقامات پر منتقل کر دیا گیا ہے۔
قصور
قصور کے ہیڈ گنڈا سنگھ والا کے مقام پر پانی کی سطح 21.30 فٹ اور بہاؤ ایک لاکھ 30 ہزار کیوسک ریکارڈ کیا گیا، اونچے درجے کے سیلاب سے 72 دیہات متاثر ہونے کا خدشہ ہے۔
انتظامیہ نے بتایا کہ ہزاروں ایکڑ زرعی اراضی زیر آب آ چکی ہے، نگر ایمن پورہ، مبوکی، بستی ابرہیم، ماہی والا، فتی والا سمیت 30 سے زائد دیہات کا زمینی راستہ منقطع ہو چکا ہے۔
ڈپٹی کمشنر عمران علی نے کہا کہ انتظامیہ کی طرف سے متاثرہ علاقوں سے انخلا کے لیے مساجد میں اعلانات کرائے جا رہے ہیں، لوگوں کے جان ومال کے تحفظ کے لیے انخلا ہو گا، دریا کے پار جانے پر پابندی ہو گی۔
بہاولنگر
دریائے ستلج میں بونگہ احسان کے قریب نوجوان دریا میں گر کر ڈوب گیا، نوجوان کی تلاش کے لیے ریسکیو آپریشن شروع کر دیا، موضع سنتیکا، عاکوکا اور بھوریکا کے مقام سے چھوٹے حفاظتی بند ٹوٹ گئے، پانی فصلوں میں داخل ہو گیا، متعدد آبادیاں زیر آب آ چکی ہیں جبکہ دریائی پٹی سے زمینی رابطہ بھی منقطع ہو چکا ہے اور علاقہ مکینوں کی نقل مکانی جاری ہے۔
عارف والا
ضلعی انتظامیہ کی جانب سے درمیانے درجے کے سیلاب کا الرٹ جاری کیا گیا ہے، لوگوں کو مال مویشیوں سمیت دریائی علاقہ چھوڑنے کی ہدایت کر دی گئی، سیکڑوں ایکڑ اراضی ڈوب چکی ہے۔
منچن آباد
دریائے ستلج میں بابا فرید پل پر پانی کی سطح مسلسل بلند ہو رہی ہے، سیلابی صورتحال کے پیش نظر ریسکیو ٹیموں کی تعداد بڑھا دی گئی، ستلج کے اطراف میں آباد لوگوں کو فوری نقل مکانی کی ہدایت کر دی گئی، متاثرہ افراد کیلئے 6 ریسکیو ریلیف کیمپ قائم کیے گئے ہیں۔
پنجاب میں آج سے بارشوں کی پیشگوئی
آج سے پنجاب کے بیشتر اضلاع میں مون سون بارشوں کی پیشگوئی کی گئی ہے، مون سون بارشوں کا 8 واں اسپیل 27 اگست تک جاری رہے گا۔
راولپنڈی، مری، گلیات، اٹک، چکوال، جہلم ، منڈی بہاؤالدین، گجرات، گوجرانوالہ ، حافظ آباد اور وزیر آباد میں بارشوں کی پیشگوئی ہے۔
لاہور، قصور، شیخوپورہ، سیالکوٹ، نارووال، میانوالی، خوشاب، سرگودھا، جھنگ، ننکانہ اور ٹوبہ ٹیک سنگھ میں بھی بارشیں ہوں گی۔
ڈیرہ غازی خان، بھکر، لیہ، ملتان، بہاولپور، بہاولنگر، راجن پور اور رحیم یار خان میں بھی گرج چمک کے ساتھ بارشوں کی پیشگوئی ہے۔
ڈی جی ڈیزاسٹر مینجمنٹ اتھارٹی عرفان علی کاٹھیا نے بتایا کہ دریائے ستلج میں گنڈا سنگھ والا کے مقام پر پانی کا بہاؤ 1 لاکھ 29 ہزار کیوسک تک پہنچ گیا، دریائے ستلج میں بھارت کی جانب سے مزید پانی چھوڑے جانے کا خدشہ ہے، دریائے ستلج سے ملحقہ اضلاع کی انتظامیہ کو ہائی الرٹ کر دیا گیا ہے۔
