اسلام آباد: (دنیا نیوز) سرمایہ کاری کے نام پر فراڈ کا کیس، قومی احتساب بیورو نے متاثرین کو رقم کی آن لائن منتقلی شروع کر دی۔
نیب کے نئے ڈیجیٹل تقسیم نظام کا باقاعدہ آغاز کر دیا گیا، نیب نے بی فور یو نامی کمپنی سے برآمد رقم کی متاثرین کو آن لائن منتقلی شروع کردی، یہ نظام عوام کو رقم کی واپسی کے عمل کو آسان، شفاف اور موثر بنائے گا۔
نیب راولپنڈی نے ایک ہی دن میں 5008 متاثرین کے اکاؤنٹس میں 878 ملین روپے منتقل کیے، نیا نظام نیب کے لیے ایک سنگِ میل ہے۔
چیئرمین نیب کا کہنا تھا کہ نئی پالیسی کے تحت متاثرین کو اپنی رقم لینے کے لیے نیب دفاتر کے چکر نہیں لگانے پڑیں گے۔
انہوں نے کہا کہ ٹیکنالوجی کے ذریعے رقم کی واپسی کے عمل کو زیادہ مؤثر، شفاف اور سہل بنا رہے ہیں۔
نیب اور نیشنل بینک کے مابین متاثرین کو آن لائن رقم کی منتقلی کے حوالے سے ایک معاہدہ بھی طے پایا ہے۔
