اسلام آباد: (دنیا نیوز) وزیراعظم محمد شہبازشریف سے سپیکر قومی اسمبلی ایاز صادق کی ملاقات ہوئی۔
پارلیمانی امور اور سپیکر کے حالیہ دورہ بنگلہ دیش پر تبادلہ خیال کیا گیا، سپیکر نے بھارتی وزیر خارجہ جے شنکر سے ملاقات پر وزیراعظم کو اعتماد میں لیا۔
سپیکر قومی اسمبلی ایاز صادق نے بتایا کہ بھارتی وزیر خارجہ نے خود میری نشست پر آکر ملاقات کی، خود اپنا تعارف کرایا، میں نے بھی ان کا احوال دریافت کیا، بھارتی وزیر خارجہ سے غیر رسمی ملاقات کے دوران محتاط رویہ اختیار کیا۔
سردار ایاز صادق نے بڑا انکشاف کرتے ہوئے کہا بھارتی وفد نے مجھے خالدہ ضیا کے جنازے میں شرکت سے زبردستی روکنے کی کوشش کی، پاکستان، مالدیپ، نیپال بھوٹان کے وفود کو ایک بس میں جنازہ گاہ لایا گیا۔
سپیکر قومی اسمبلی نے بتایا کہ بس میں سوار ہوا تو بھارتی وزیر خارجہ جے شنکر اور ہائی کمشنر فرنٹ سیٹ پر بیٹھے تھے، بس جنازہ گاہ پہنچی تو بھارتی ہائی کمشنر بس کے دروازے پر کھڑے ہوگئے، نیچے اترنے لگا تو بولے آپ مت جائیں نیچے رش ہے آپ کو خطرہ ہے۔
انہوں نے مزید بتایا کہ ان سے کہا دروازہ کھولیں میں آیا ہی جنازے میں شرکت کیلئے ہوں، دروازہ نہیں کھولا تو غصے سے بولا، دروازہ کھولو، اس نے دروازہ کھولا تو نیپال اور مالدیپ کے وفود کو ساتھ لیکر نیچے اتر گیا۔
ایاز صادق کا کہنا ہے کہ بھارتی ہائی کمشنر کی پوری کوشش تھی نماز جنازہ نہ پڑھ سکوں اور یہ اسے ایشو بنا سکیں، بھارتی وفد پوری تیاری کے ساتھ منصوبہ بندی کے تحت وہاں آیا تھا۔
