صوبائی وزیر اقلیتی امور کی زیرِ صدارت سکھ میرج ایکٹ اور گرمکھی سکول سے متعلق ایک اہم اجلاس منعقد ہوا جس میں سکھ میرج ایکٹ کے تحت شادی کے رجسٹر ایک ہفتے کے اندر جاری کرنے کی ہدایت دی گئی، اجلاس میں تمام قانونی اور انتظامی مراحل ترجیحی بنیادوں پر مکمل کرنے کے احکامات بھی دیے گئے۔

اجلاس کے دوران وزیراعلیٰ پنجاب مریم نواز کے اقلیتوں کے حقوق کے تحفظ اور فلاح کے لیے اٹھائے گئے اقدامات کو سراہا گیا، اس موقع پر ہندو میرج رجسٹر کے اجرا کے عمل کو بھی تیز کرنے کی ہدایت دی گئی۔

صوبائی وزیر رمیش سنگھ اروڑہ نے کہا کہ لاہور میں سکھ خاندانوں کی تعداد میں نمایاں اضافہ ہو رہا ہے جہاں اس وقت 100 سے زائد سکھ خاندان رہائش پذیر ہیں، اسی لیے لاہور میں گرمکھی سکول کی اشد ضرورت ہے، لاہور میں قائم کیا جانے والا گرمکھی سکول ایک کمیونٹی سینٹر کے طور پر بھی خدمات انجام دے گا۔

رمیش سنگھ اروڑہ کا کہنا تھا کہ جس طرح ننکانہ صاحب کا گرمکھی سکول بین الاقوامی سطح پر پذیرائی حاصل کر چکا ہے، اسی طرح لاہور کا گرمکھی سکول بھی عالمی سطح پر شناخت حاصل کرے گا۔