اسلام آباد:(دنیا نیوز) محکمہ موسمیات نے ملک بھر میں شدید سردی سے متعلق گردش کرنے والی خبروں کی تردید کرتے ہوئے کہا ہے کہ سوشل میڈیا، الیکٹرانک اور پرنٹ میڈیا میں شدید سردی کے حوالے سے جو خبریں زیر گردش ہیں وہ درست نہیں ہیں۔
محکمہ موسمیات ترجمان کے مطابق تازہ موسمیاتی رپورٹ ان دعوؤں کی واضح تردید کرتی ہے، سردی کے موسم میں محکمہ موسمیات کی جانب سے کی جانے والی پیش گوئیاں حقیقت کے قریب ثابت ہو رہی ہیں اور صورتحال معمول کے مطابق ہے۔
انہوں نے کہا کہ عوام اور ذرائع ابلاغ سے اپیل کی ہے کہ موسمی صورتحال کے حوالے سے صرف محکمہ موسمیات کی مستند رپورٹس اور خبروں پر ہی اعتماد کریں ۔
ترجمان کا کہنا تھا کہ گزشتہ ماہ ملک میں معمول سےکم بارشیں اوردرجہ حرارت میں اضافہ ریکارڈ کیا گیا، پاکستان میں مجموعی طور پر معمول سے 34 فیصد کم بارش ریکارڈ کی گئی، پنجاب میں 73 ،سندھ 71،خیبرپختونخوا میں 39 فیصد کم بارشیں ریکارڈکی گیئں، بلوچستان میں 11 فیصد معمول سے کم بارشیں ریکارڈ کی گئی ہے۔
اِسی طرح گلگت بلتستان میں 25،آزادکشمیر میں 39 فیصد کم بارش ریکارڈ کی گئی، دسمبر2025ءمیں درجہ حرارت معمول سےزیادہ 1.2سینٹی گریڈ ریکارڈ ہوا، گلگت بلتستان میں 2.3،خیبرپختونخوامیں 1.5سینٹی گریڈدرجہ حرارت ریکارڈ ہوا، پنجاب میں درجہ حرارت 1.9اوربلوچستان میں 1.2سینٹی گریڈ رہا۔
