ترجمان دفتر خارجہ کے مطابق اسحاق ڈار یہ دورہ اردن کے نائب وزیراعظم و وزیر خارجہ ایمن الصفدی کی دعوت پر کر رہے ہیں، اجلاس میں عرب لیگ کے رکن ممالک اور پاکستان سمیت اسلامی ممالک کے گروپ کے وزرائے خارجہ شرکت کریں گے۔

ترجمان نے بتایا کہ اجلاس کا مقصد مقبوضہ القدس میں تیزی سے بگڑتی صورتحال پر متفقہ اور مشترکہ مؤقف اختیار کرنا ہے، اجلاس میں شریک وزرائے خارجہ اردن کے فرمانروا شاہ عبداللہ دوم ابن الحسین سے بھی ملاقات کریں گے۔

— Ministry of Foreign Affairs - Pakistan (@ForeignOfficePk) August 4, 2026

اسحاق ڈار اجلاس کے موقع پر شریک ممالک کے وزرائے خارجہ سے دوطرفہ ملاقاتیں بھی کریں گے، جن میں فلسطین سمیت خطے کی تازہ صورتحال اور باہمی دلچسپی کے دیگر امور پر تبادلہ خیال کیا جائے گا۔

ترجمان دفتر خارجہ کے مطابق اجلاس میں پاکستان کی شرکت فلسطینی عوام کی اصولی حمایت اور قیامِ فلسطین کے لیے پاکستان کے غیر متزلزل عزم کا اظہار ہے۔

دفتر خارجہ کے ترجمان کے مطابق پاکستان اپنے مؤقف پر قائم ہے کہ ایک آزاد اور خودمختار فلسطینی ریاست 1967 سے پہلے کی سرحدوں کی بنیاد پر، القدس الشریف کو دارالحکومت بنا کر قائم ہونی چاہیے۔