خلاصہ
- ریاض: (ویب ڈیسک) پاکستانی سفارت خانے کی جانب سے سعودی عرب آنے والے پاکستانی عمرہ زائرین اور ورکرز کو اہم ہدایات جاری کرتے ہوئے سعودی قوانین کی سختی سے پابندی کرنے، بھیک مانگنے سمیت کسی بھی غیر قانونی سرگرمی سے گریز کرنے اور اپنے قیام کے دوران ذمہ دارانہ طرزِ عمل اختیار کرنے پر زور دیا ہے۔
سفارت خانے نے اپنے سرکاری ایکس اکاؤنٹ پر جاری ایک ویڈیو پیغام میں پاکستانی شہریوں کو سعودی عرب میں قیام کے دوران ویزے کی شرائط کی پابندی، مقررہ مدت سے زائد قیام سے گریز اور کسی بھی غیر قانونی سرگرمی میں ملوث نہ ہونے کی ہدایت کی ہے۔
ویڈیو میں گرفتاری، تفتیش، حراست اور ملک بدری کے مناظر کے ذریعے سعودی قوانین کی خلاف ورزی کے ممکنہ نتائج سے آگاہ کیا گیا ہے۔
— Pakistan Embassy Saudi Arabia (@PakinSaudiArab) August 16, 2026
سفارت خانے کے پیغام میں خاص طور پر بھیک مانگنے سے گریز کرنے پر زور دیا گیا ہے، پیغام کے مطابق سعودی عرب آنے والے پاکستانی زائرین اور ورکرز اپنے طرزِ عمل کا خیال رکھیں اور ایسے کسی اقدام سے گریز کریں جو سعودی قوانین کی خلاف ورزی کے زمرے میں آتا ہو۔
پاکستانی سفارتخانے کی جانب سے جاری ویڈیو میں عمرہ زائرین کو مقدس مقامات کے احترام، سعودی قوانین کی پاسداری اور اپنے قیام کے دوران ذمہ دارانہ رویہ اختیار کرنے کی تلقین بھی کی گئی ہے۔
سفارت خانے کے اس پیغام پر سوشل میڈیا صارفین نے بھی مختلف ردعمل کا اظہار کیا اور سعودی عرب میں پاکستانی شہریوں کی جانب سے بھیک مانگنے کے واقعات پر افسوس اور تشویش کا اظہار بھی کیا ہے۔
