محکمہ بلدیات پنجاب نے انتخابات دسمبر یا جنوری کے بجائے اپریل 2027 میں کرانے کی تجویز پر غور شروع کر دیا۔

ذرائع کے مطابق محکمہ سکول ایجوکیشن نے محکمہ بلدیات کو تجویز دی ہے کہ 15 دسمبر سے یکم جنوری تک پنجاب میں سموگ اور فوگ کے امکانات کے باعث بلدیاتی انتخابات کی تاریخ تبدیل کی جائے۔

ذرائع کا کہنا ہے کہ محکمہ بلدیات پنجاب کی جانب سے مقامی حکومتوں کے انتخابات اپریل 2027 میں کرانے کی تجویز زیرِ غور ہے، اس حوالے سے محکمہ بلدیات پنجاب کی جانب سے وزیراعلیٰ پنجاب کو کابینہ اجلاس میں تفصیلی بریفنگ دی جائے گی۔

ذرائع کے مطابق الیکشن کمیشن کی جانب سے بلدیاتی انتخابات کا شیڈول بھی کابینہ کمیٹی کے اجلاس میں پیش کیا جائے گا، جبکہ انتخابات کی تاریخ سے متعلق حتمی فیصلہ وزیراعلیٰ پنجاب کی منظوری سے مشروط ہوگا۔

وزیر بلدیات پنجاب ذیشان رفیق نے بھی تصدیق کی ہے کہ محکمہ سکول ایجوکیشن کی جانب سے مقامی حکومتوں کے انتخابات کی تاریخ تبدیل کرنے کی تجویز زیرِ غور ہے، وزیراعلیٰ پنجاب کو مقامی حکومتوں کے انتخابات دسمبر یا جنوری کے بجائے اپریل 2027 میں کرانے سے متعلق آگاہ کیا جائے گا۔

حکام کے مطابق انتخابات کی نئی تاریخ، شیڈول اور دیگر انتظامی معاملات پر حتمی فیصلہ متعلقہ فورمز پر مشاورت کے بعد کیا جائے گا۔