تازہ ترین
  • بریکنگ :- ایک ماردرپدرآزادمعاشرہ تشکیل دینےکی کوشش کی گئی،فضل الرحمان
  • بریکنگ :- اڈےنہ دینےکافیصلہ عمران خان نےعوامی دباؤپرکیا،فضل الرحمان
  • بریکنگ :- مہنگائی کاپہاڑگرنےوالاہے،یہ صرف باتیں کرتےرہیں گے،فضل الرحمان

فرانس میں کورونا وائرس کی تیسری لہر خطرناک، فرنچ اوپن ملتوی ہونے کا خدشہ

Published On 05 April,2021 10:30 pm

پیرس: (ویب ڈیسک) فرانس کی وزیر کھیل نے کہا ہے کہ ملک میں کورونا وائرس کے بڑھتے کیسز کی وجہ سے ٹینس کے بڑے ایونٹ فرنچ اوپن کو ملتوی کئے جانے کا امکان ہے۔

خیال رہے کہ ہفتہ کے روز سے فرانس میں کورونا وائرس کے خطرات کے پیش نظر سخت لاک ڈاؤن نافذ کر دیا گیا ہے۔ تمام کاروباری سرگرمیوں کو محدود کرتے ہوئے شہریوں پر زور دیا گیا ہے کہ وہ گھروں سے باہر نہ نکلیں۔

حکام کی جانب سے واضح ہدایات ہیں کہ صرف 10 کلومیٹر کے دائرے میں لوگوں کو سفر کی اجازت ہوگی لیکن اس کیلئے بھی سخت ضرورت کو پیش نظر رکھا جائے گا۔ شہریوں کو ایس او پیز کی سخت پابندی کرنے کا کہا گیا ہے۔

ادھر ان سخت اقدامات سے سپورٹس کو بھی شدید نقصان پہنچ رہا ہے۔ صرف کچھ کھیلوں کو ہی محدود پیمانے پر ہی اجازت دی گئی ہے۔ ان میں ٹینس کا کھیل بھی شامل ہے۔

تاہم اب کہا جا رہا ہے کہ ٹینس کے سب سے بڑے ایونٹ کو شاید رواں سال بھی ملتوی کر دیا جائے کیونکہ ملک میں کورونا وائرس کی تیسری لہر نے شدید خطرات پیدا کر دیئے ہیں۔

خیال رہے کہ کورونا وائرس کی وجہ سے گزشتہ سال فرنچ اوپن کو 4 ماہ کیلئے ملتوی کر دیا گیا تھا، تاہم بعد ازاں محدود تماشائیوں کیساتھ یہ ایونٹ منعقد کرنے کی اجازت دیدی گئی تھی۔

رواں سال فرنچ اوپن کے افتتاح کیلئے 23 مئی کی تاریخ رکھی گئی ہے لیکن حکام کی جانب سے ایسے بیانات سامنے آ رہے ہیں کہ اس کا انعقاد صحت عامہ کے جائزے کے بعد ہی لیا جائے گا۔ اگر کووڈ 19 کی صورتحال بدستور برقار رہی تو کوئی بعید نہیں کہ اس ایونٹ کو ملتوی کر دیا جائے۔