ریاض :(ویب ڈیسک ) سپورٹس ارینا میں کانٹے کے مقابلے کے بعد حمزہ شیراز امریکی حریف کو ہرا کر 20 فتوحات کے ساتھ تاحال ناقابلِ شکست ہیں۔
کھیلوں کے حوالے سے قوم کے لیے سعودی عرب سے اچھی خبر آئی ہے، سعودی دارالحکومت ریاض کے سپورٹس ارینا میں پاکستانی نژاد برطانوی باکسر حمزہ شیراز نے امریکی باکسر آسٹن ایمو ولیمز کو گیارہویں راؤنڈ میں ناک آؤٹ کردیا۔
ورلڈ باکسنگ کونسل کے تحت مڈل ویٹ کیٹیگری کا یہ مقابلہ کانٹے کا تھا، پاکستانی نژاد برطانوی باکسر نے غیر معمولی مزاحمت کا مظاہرہ کیا اور حریف کو مکمل طور پر حاوی نہیں ہونے دیا، آسٹن ایمو ولیمز کو بھی فیورٹ قرار دیا جارہا تھا مگر حمزہ شیراز نے اُسے کسی بھی مرحلے پر تابر توڑ حملے کرنے کا موقع نہیں دیا۔
امریکی باکسر کے ناک آؤٹ ہوتے ہی ریاض سپورٹس ارینا اللہ اکبر اور پاکستان زندہ باد کے نعروں سے گونج اٹھا۔
یاد رہے حمزہ شیراز نے اب تک 20 مقابلے جیتے ہیں اور کوئی نہیں ہارا، آسٹن ولیمز بھی 16 فتوحات اور ایک شکست کے ساتھ رنگ میں اترا تھا، یہ سمجھا جارہا تھا کہ شاید اب حمزہ شریف ناقابلِ شکست نہ رہیں مگر اُنہوں نے تگڑے حریف کے خلاف شاندار قوتِ مزاحمت کا مظاہرہ کرکے ماہرین کو ورطہ حیرت میں ڈال دیا۔
