کرکٹ سکاٹ لینڈ کے چیف ایگزیکٹو ٹروڈی لینڈبلیڈ نے کہا ہے کہ ہم اپنی ٹیم کو 7 فروری کے افتتاحی میچ کیلئے تیار کرنے پر شب و روز کام کررہے ہیں، ہم واقعی بنگلہ دیش کی ٹیم کیلئے ہمدردی رکھتے ہیں، ظاہر ہے یہ وہ طریقہ نہیں جس سے ہم ورلڈ کپ کھیلنا چاہتے تھے۔

ان کا کہنا تھا کہ عالمی ایونٹ میں رسائی کا ایک طریقہ کار ہوتا ہے، کوئی بھی اس طرح سے مدعو ہو کر ایونٹ میں نہیں جانا چاہتا، ہمارے لئے یہ غیرمعمولی حالات ہیں، ہم بنگلہ دیشی کھلاڑیوں کے دکھ کا احساس کرتے ہیں۔

لیڈبلیڈ نے کہا کہ اس بارے میں لوگوں کی مختلف رائے ہوسکتی ہے اور انہیں اس کا حق بھی ہے لیکن ہمیں صرف یہ معلوم ہے کہ ورلڈکپ میں شرکت کی دعوت دی گئی ہے جسے قبول کرنا چاہیے۔

واضح رہے کہ گزشتہ جولائی میں منعقدہ یورپ ریجنل فائنل میں اٹلی اور جرسی کے خلاف شکستوں کے باعث سکاٹ لینڈ ورلڈکپ میں کوالیفائی نہیں کر سکا تھا تاہم بھارت اور بنگلہ دیش کے درمیان حالیہ تناؤ کی صورتحال کے بعد سکاٹ لینڈ کو بنگلہ دیش کی جگہ ٹیم میں شامل کر لیا گیا ہے۔