نیویارک:(روزنامہ دنیا) اگر آپ گھر سے باہر ہیں تو موبائل فون چارج کرنا ایک مشکل مرحلہ ہوتا ہے تاہم ماہرین نے اس کا کارآمد حل کلائی میں پہنے جانے والے پاور بینک کی صورت متعارف کروا دیا ہے۔
میڈیا رپورٹ کے مطابق آج کے تیز رفتار دور میں ہمیں فون چارج رکھنا پڑتا ہے اور حال یہ ہے کہ ہمہ وقت فون چارجر یا پاوربینک ساتھ رکھنا پڑتا ہےلیکن اب ہاتھ میں پہنا جانے والا ایک کڑا پاور بینک اور چارجر کا متبادل ثابت ہوسکتا ہے جسے ‘‘کے نیکٹ’’ کا نام دیا گیا ہے ۔بالخصوص سفر کے دوران فون چارج کرنے کی ضرورت پیش آتی ہے اور اسی مشکل کے پیشِ نظر ہاتھوں میں پہنا جانے والا ایک خوشنما کڑا بنایا گیا ہے جو پاوربینک کا کام دیتا ہے۔
اس کڑے کی بدولت بجلی کے پلگ، تاروں اور چارجر وغیرہ سے خلاصی مل جاتی ہے ۔ کے نیکٹ ایک دھاتی کڑا ہے جو پانچ رنگوں اور تین سائز میں دستیاب ہے ۔ اس چارجر کو ایک زیور کی طرح کلائی پر پہنا جاسکتا ہے ۔ یہ کڑا آئی فون اور آئی پیڈ کے تمام ماڈل کے لیے کارآمد ہے ۔ کے نیکٹ کی گنجائش 2000 ایم اے ایچ ہے۔
