ممبئی: (ویب ڈیسک ) بھارتی ٹیلی کام کمپنی نے سپیس ایکس سے بھارت میں سٹارلنک انٹرنیٹ سروس فراہم کرنے کا معاہدہ کرلیا۔
بھارتی میڈیا رپورٹس کے مطابق سٹار لنک کی لائسنس درخواست ابتدائی منظوری کے قریب پہنچ چکی ہے جبکہ بھارتی ٹیلی کام کمپنی نے اپنے بیان میں کہا ہے کہ سپیس ایکس کو بھارت میں سٹار لنک کی فروخت کے لیے ضروری اجازت نامے حاصل کرنا ہوں گے جس کے بعد یہ معاہدہ نافذ العمل ہوگا۔
غیر ملکی خبررساں ایجنسی کے مطابق بھارتی کمپنی اور سپیس ایکس مل کر سٹار لنک کے آلات کو ریٹیل دکانوں میں متعارف کرانے، کاروباری صارفین کے لیے سٹار لنک سروس فراہم کرنے اور دیہی علاقوں میں مقامی آبادیوں، سکولوں اور طبی مراکز کوانٹرنیٹ فراہم کرنے کے امکانات کا جائزہ لیں گے۔
میڈیا رپورٹ میں بتایا گیا کہ سپیس ایکس کی چیف آپریٹنگ آفیسر گوین شوٹویل نے اپنے بیان میں کہا کہ سپیس ایکس بھارتی کمپنی کے ساتھ کام کرنے اور سٹار لنک سے لوگوں کو فائدہ پہنچانے کے لیے پُرجوش ہے۔
غیر ملکی خبررساں ایجنسی کے مطابق بھارت میں ایلون مسک کے موجودہ کاروباری مفادات فی الحال صرف سوشل میڈیا پلیٹ فارم ایکس تک محدود ہیں، تاہم ان کی الیکٹرک گاڑیاں بنانے والی کمپنی ٹیسلا جلد ہی بھارتی مارکیٹ میں قدم رکھنے والی ہے۔
واضح رہے گزشتہ ماہ ٹیسلا نے بھارت میں ملازمتوں کے اشتہارات دیے تھے جو کہ وزیر اعظم مودی اور ایلون مسک کی ملاقات کے چند دن بعد سامنے آئے تھے۔
