نئی دہلی: (ویب ڈیسک) دولہے کی انوکھی حرکت پر دلہن والوں نے شادی منسوخ کر دی۔
بھارتی دارالحکومت نئی دہلی میں عجیب و غریب واقعہ پیش آیا جہاں دولہے کو بالی ووڈ کے ایک مشہور ڈانس نمبر پر رقص کرنا مہنگا پڑ گیا۔
انڈین میڈیا کی رپورٹس کے مطابق دولہا بارات کے ساتھ دلہن کے گھر پہنچا جہاں اس کے دوستوں نے اسے ڈانس کرنے پر مجبور کیا، جب بالی ووڈ کا مقبول ڈانس نمبر بجایا گیا تو وہ اپنے آپ کو روک نہ سکا۔
شادی کی تقریب میں موجود مہمان دولہے کا منفرد رقص دیکھ کر لطف اندوز ہوئے لیکن نوجوان کی یہ حرکت لڑکی والوں کو پسند نہ آئی۔
دلہن کے والد نے غصے میں گانا بند کروایا اور شادی منسوخ کرنے کا اعلان کر دیا جس سے ہر کوئی ہکا بکا رہ گیا جبکہ دولہے کے چہرے کے رنگ اڑ گئے، والد نے کہا کہ لڑکے کی یہ حرکت میرے خاندان کی توہین ہے۔
ایک طرف دلہن روتی رہی جبکہ دوسرے طرف دولہا اس کے والد کو سمجھاتا رہا کہ وہ ایسا لڑکا نہیں ہے، لیکن اس کی کوششیں رائیگاں گئیں۔
مذکورہ واقعے کی خبر جب سوشل میڈیا پلیٹ فارم ایکس پر وائرل ہوئی تو صارفین نے اس پر اپنی رائے کا اظہار کیا، ایک نے لکھا کہ ’دولہا مہمانوں کی تفریح کیلئے رقص کرتا ہے جبکہ دلہن والوں نے شادی منسوخ کر دی‘۔
