ریاض: (ویب ڈیسک) ایرانی وفد سعودی عرب میں اپنے سفارتی مشن کی بحالی کیلئے دارالحکومت ریاض پہنچ چکا ہے۔
بین الاقوامی میڈیا کے مطابق سات سال سے تعلقات کشیدہ رہنے کے بعد ایرانی وفد سعودی عرب میں سفارتی مشن کی بحالی کیلئے ریاض پہنچا ہے، کچھ دن پہلے سعودی وفد نے بھی ایران میں سفارتی مشن کی بحالی کیلئے تہران کا دورہ کیا تھا۔
ایران کی وزارت خارجہ کے ترجمان ناصر کنعانی نے کہا کہ ایران اور سعودی عرب کے درمیان سفارتی سرگرمیاں بحال کرنے کے معاہدے پر عمل درآمد کے مطابق ایرانی تکنیکی وفد بدھ کی دوپہر ریاض پہنچا اور سعودی حکام نے اس کا استقبال کیا۔
انہوں نے مزید کہا کہ ایرانی وفد ریاض میں سفارت خانہ اور جدہ میں قونصل خانے کے ساتھ ساتھ اسلامی تعاون تنظیم میں ایران کی مستقل نمائندگی کیلئے ضروری اقدامات کرے گا۔
