بھارت نے کینیڈین شہریوں کیلئے ویزا سروس غیر معینہ مدت تک معطل کردی

Published On 21 September,2023 02:02 pm

نئی دہلی : (ویب ڈیسک ) بھارت اور کینیڈا کے درمیان بڑھتی ہوئی کشیدہ صورتحال کے باعث بھارت نے کینیڈا کے شہریوں کے لیے ویزوں کا اجرا غیر معینہ مدت کے لیے معطل کردیا ہے۔

غیر ملکی خبر رساں ادارے کے مطابق بھارتی مشن کا کہنا ہے کہ آپریشنل وجوہات کی بنا پر بھارتی ویزا کا اجرا اگلے نوٹس تک معطل کر دیا گیا ہے۔

میڈیا رپورٹس کے مطابق اس حوالے سے کوئی باضابطہ اعلان نہیں کیا گیا ہے تاہم اس سلسلے میں ویزا فراہم کرنے والی بھارتی کمپنی بی ایل ایس انٹرنیشنل نے کینیڈین ویب سائٹ پر پیغام جاری کیا گیا کہ بھارتی مشن کے جاری کردہ نوٹس کے مطابق آپریشنل وجوہات کی بنا پر جمعرات 21 ستمبر 2023 سے، بھارتی ویزا سروسز کو اگلے نوٹس تک معطل کر دیا گیا ہے۔

بی ایل ایس انٹرنیشنل بھارت میں قائم ایک کمپنی ہے، جو دنیا بھر میں سرکاری اور سفارتی مشنوں کے لیے آن لائن ویزا خدمات پیش کرتی ہے۔

یہ بھی پڑھیں :کینیڈا کی جانب سے بھارت کی ٹریول ایڈوائزری مسترد

واضح رہے کہ عالمی وباء کورونا وائرس کے بعد یہ پہلا موقع ہے جب بھارت نے ویزا کا اجرا معطل کیا ہے۔

دوسری جانب بھارت سے علیحدہ وطن کا مطالبہ کرنے والے ایک اور سکھ رہنما سکھ دول سنگھ (سکھا دونیکے) کو آج کینیڈا میں قتل کر دیا گیا ہے، یہ واقعہ ایک ایسے وقت میں سامنے آیا ہے جب کینیڈا میں ایک سکھ رہنما ہردیپ سنگھ نجر کے قتل پر بھارت اور کینیڈا کے درمیان سفارتی کشیدگی جاری ہے۔

 

Advertisement