شام میں اسرائیلی حملے ، دمشق انٹرنیشنل ایئرپورٹ بند کردیا گیا

Published On 27 November,2023 11:39 am

دمشق : (ویب ڈیسک ) شام کے درالحکومت دمشق میں اسرائیلی فوج کے فضائی حملوں کے باعث دمشق کے انٹرنیشنل ایئرپورٹ پر سروسز معطل کر دی گئیں۔

خبر رساں ادارے نے شامی میڈیا کے حوالے سے بتایا کہ شام کے دارالحکومت دمشق میں ایک زوردار دھماکے کی آواز آئی جس کے بعد المزہ اور المعضمیہ کے آس پاس کے علاقوں میں دھوئیں کے بادل بلند ہوتے دیکھے گئے۔

شامی میڈیا اسرائیل کی جانب سے نشانہ بنائے جانے کے نتیجے میں دمشق کے انٹرنیشنل ایئرپورٹ پر سروسز معطل ہوگئی ہیں ، سیریئن آبزرویٹری نے دارالحکومت دمشق میں کم از کم 2 دھماکوں کی آوازیں سننے کی اطلاع دی۔

دمشق بین الاقوامی ہوائی اڈے کے ایک ذریعہ نے پریس بیانات میں وضاحت کی کہ اسرائیلی حملوں سے دمشق کے بین الاقوامی ہوائی اڈے کے رن وے کو نقصان پہنچا جس کے باعث ایئرپورٹ پر آپریشن روک دیا گیا۔

حملوں کے باعث دمشق آنے والے طیاروں کا رخ حلب اور لاذقیہ ہوائی اڈوں کی طرف موڑ دیا گیا ۔

واضح رہے کہ شام میں 2011میں خانہ جنگی شروع ہونے کے بعد اسرائیل نے سیکڑوں فضائی حملے کئے ہیں۔

 

Advertisement