ریاض: (ویب ڈیسک) سعودی عرب میں ایک ہفتے میں 22 ہزار غیر قانونی تارکین کو گرفتار کر لیا گیا۔
میڈیا رپورٹ کے مطابق غیر قانونی تارکین کے خلاف کام کرنے والی مشترکہ کمیٹی کی جانب سے جاری بیان میں کہا گیا ہے کہ یہ گرفتاریاں 6 فروری سے 13 فروری 2025 کے درمیان ہوئی ہیں جن میں سے 13799 اقامہ قوانین کی خلاف ورزی، 5597 گرفتار شدگان سرحدی قوانین کی خلاف ورزی جبکہ 3270 تارکین لیبر قوانین کی خلاف ورزی میں ملوث تھے۔
انہوں نے کہا کہ مذکورہ عرصے کے دوران 2133 افراد گرفتار ہوئے ہیں جو سرحد عبور کرکے ملک میں غیر قانونی طور پر داخل ہونے کی کوشش کر رہے تھے جن میں سے 36 فیصد یمنی، 63 فیصد ایتھوپی جبکہ ایک فیصد دیگر ممالک کے تارکین تھے۔
کمیٹی کا مزید کہنا تھا کہ غیر قانونی تارکین کو سہولت فراہم کرنے پر 14 افراد گرفتار ہوئے ہیں، دوسری جانب وزارت داخلہ نے کہا ہے کہ غیر قانونی تارکین کو کسی بھی قسم کی سہولت فراہم کرنا سنگین جرم ہے جس پر 15 سال قید اور 10 لاکھ ریال جرمانہ ہوسکتا ہے۔
