نئی دہلی: (دنیا نیوز) سکھ فار جسٹس(ایس ایف جے) کا کہنا ہے کہ بلوچستان میں سکول بس پر خودکش حملے کے پیچھے بھارت کا ہاتھ ہے۔
سکھ فار جسٹس کے قانونی مشیر گروپتونت سنگھ پنوں نے مودی حکومت کو پاکستان میں بچوں کو نشانہ بنانے کا ذمہ دار ٹھہراتے ہوئے کہا کہ بلوچستان میں پاکستان آرمی سکول کی بس پر بے رحمانہ بمبار حملہ ہندوستان کی مودی حکومت کے تمام نشانات کو ظاہر کرتی ہے۔
انہوں نے کہا کہ انڈیا کا ریسرچ اینڈ اینالیسس ونگ (RAW) پاکستان بھر میں بین الاقوامی دہشت گردی کو آگے بڑھانے کے لیے علاقائی پراکسیز کو مسلح اور مالی امداد فراہم کر رہا ہے، اس حملے سے متعلق شواہد براہ راست اس "گندی جنگ " کی طرف اشارہ کرتے ہیں جو مودی دہشت گردی کی خفیہ کارروائیوں کے ذریعے چھیڑ رہا ہے۔
یہ بھی پڑھیں: خضدار میں دہشتگردوں کا سکول بس پر خودکش حملہ، 3 بچوں سمیت 5 افراد شہید
پنوں نے مزید کہا کہ اگر ہندوتوا کی دہشت گردی ایودھیا میں پیدا ہوئی اور ناگپور میں پروان چڑھی، تو کیا یہ بھارتی شہر پاکستان کی طرف سے حملے کے لیے" جائز اہداف " قرار پاتے ہیں؟ ایودھیا اب صرف ایک مندر کا منصوبہ نہیں ہے، یہ بنیاد پرست ہندوتوا نظریے کی افزائش گاہ ہے جو ہندوستان کی سرحدوں سے باہر تشدد اور دہشت گردی کو برآمد کرتا ہے۔
پاکستان کی خودمختاری اور دفاع کے لیے اپنی غیر متزلزل حمایت پر زور دیتے ہوئے پنوں نے کہا کہ ہم پاک فوج کے ساتھ کھڑے ہیں اور اعلان کرتے ہیں کہ ہم ہندوستانی افواج کو پاکستان کے خلاف جنگ چھیڑنے کے لیے پنجاب کو لانچ پیڈ کے طور پر استعمال کرنے کی اجازت نہیں دیں گے۔
ایس ایف جے نے متاثرین کے ساتھ بھی یکجہتی کا اظہار کرتے ہوئے کہا کہ ہم اس بزدلانہ حملے میں ہلاک ہونے والے بچوں کے خاندانوں کے دکھ میں شریک ہیں اور ان ساتھ غمزدہ ہیں، پاکستان میں کوئی بچہ مودی کے ہندوتوا دہشت گردی کے جنون کا شکار نہیں ہونا چاہیے۔
