غزہ: (دنیا نیوز) غزہ میں اسرائیلی مظالم تھم نہ سکے۔
صیہونی فورسز کے تازہ حملوں میں مزید 80 سے زائد فلسطینی شہید اور درجنوں زخمی ہوگئے، شہدا کی مجموعی تعداد 65 ہزار 382 ہوگئی، یمن سے انصار اللہ نے اسرائیل پر ڈرون حملہ کیا،20اسرائیلی شدید زخمی ہوگئے جنہیں ہسپتال منتقل کر دیا گیا،2 کی حالت تشویشناک بتائی گئی ہے۔
واضح رہے ترک صدر رجب طیب اردوگان نے ایک انٹرویو میں کہا تھا کہ غزہ میں جاری انسانی المیہ کسی اور نام سے نہیں بلکہ نسل کشی سے تعبیر کیا جانا چاہیے اور اس کا اصل مجرم اسرائیلی وزیرِاعظم بن یامین نیتن یاہو ہے ۔
نیویارک میں منعقد ہونے والے اقوامِ متحدہ کی 80ویں جنرل اسمبلی اجلاس کے سلسلے میں موجود ترک صدر نے پروگرام کے میزبان بریٹ بائیر کے سوالات کا جواب دیتے ہوئے ترکیہ کی خارجہ پالیسی، بالخصوص غزہ کی صورتحال اور روس و یوکرین جنگ پر کھل کر اظہارِ خیال کیا۔
غزہ کے بارے میں پوچھے گئے سوال پر صدر اردگان نے دوٹوک الفاظ میں کہا تھا کہ اس کی کوئی اور توجیہ ممکن نہیں، یہ 100 فیصد نسل کشی ہے اور اس کا ذمے دار نیتن یاہو ہے، نیتن یاہو نے نہایت سنگ دلی سے اس قتلِ عام میں ہزاروں بے گناہوں کو شہید کیا ہے۔
انہوں نے بتایا تھا کہ غزہ میں اب تک 1 لاکھ 25 ہزار سے زائد افراد زخمی ہو چکے ہیں جن میں سے ایک بڑی تعداد کو علاج کی غرض سے ترکیہ لایا گیا ہے۔
حماس کے بارے میں صدر اردگان نے اپنا پرانا مؤقف دہراتے ہوئے کہا کہ 20 برس قبل جب میں یہاں آیا تھا تو مجھ سے یہی سوال پوچھا گیا تھا اور میں نے تب بھی یہی کہا تھا کہ میں حماس کو دہشت گرد تنظیم نہیں بلکہ ایک مزاحمتی تحریک سمجھتا ہوں۔
