براٹیسلاوا: (ویب ڈیسک) یورپ میں واقع ملک سلواکیہ میں 2 ٹرینوں کے درمیان ہونے والے تصادم کے نتیجے میں درجنوں مسافر زخمی ہوگئے۔
غیر ملکی خبر رساں ادارے کے مطابق سلواکیہ کے وزیر داخلہ نے ٹرین حادثے کے حوالے سے بریفنگ دیتے ہوئے کہا کہ حادثے میں درجنوں افراد زخمی ہوئے جن میں سے 11 کو ہسپتال منتقل کر دیا گیا ہے۔
انہوں نے بتایا کہ یہ حادثہ دارالحکومت براٹیسلاوا سے 20 کلومیٹر شمال مشرق میں پیش آیا، میٹوس سٹواج نے تصدیق کی کہ حادثے میں فوری طور پر کوئی ہلاکت نہیں ہوئی ہے۔
خیال رہے کہ اس سے قبل بھی سلواکیہ میں گزشتہ ماہ ٹرینوں کے حادثے میں 91 افراد زخمی ہو گئے تھے۔
