صنعاء: (دنیا نیوز) یمن میں حوثی اکثریتی تنظیم انصاراللہ کی عدالت نے جاسوسی کے الزام میں 17 افراد کو سزائے موت سنا دی۔
حوثی میڈیا کے مطابق یمن کے دارالحکومت صنعاء میں حوثی انتظامیہ کی ایک عدالت نے 17 ایسے افراد کو سزائے موت سنائی ہے جو مبینہ طور پر سعودی عرب، برطانیہ اور امریکا کیلئے کام کرنے والے خفیہ نیٹ ورک کا حصہ تھے۔
سرکاری میڈیا رپورٹ کے مطابق مجرموں پر الزام تھا کہ انہوں نے 2024 سے 2025 کے درمیان حوثی مخالف ممالک کے انٹیلی جنس اہلکاروں کے ساتھ تعاون کیا اور ان کو حساس معلومات فراہم کیں۔
عدالتی فیصلے میں کہا گیا ہے کہ ملزمان نے مخالف ممالک کو سرکاری افسران اور ان کی نقل و حرکت سے متعلق معلومات دیں، اور حوثی باغیوں کے میزائل سسٹمز سے متعلق خفیہ تفصیل بھی فراہم کی۔
فیصلے کہا گیا کہ ملزمان نے مختلف حساس تنصیبات کے مقامات کی تفصیل بھی مخالفین کو فراہم کی جس کے نتیجے میں فوجی، سکیورٹی اور شہری علاقوں پر حملے ہوئے جن میں متعدد افراد جاں بحق ہوئے، عدالت نے تمام مجرموں کو فائرنگ سکواڈ کے ذریعے سزائے موت دینے کا حکم دیا ہے۔
