ملک میں سرکاری اور غیر سرکاری سطح پر ان انتخابا ت کے سبب 35 ارب روپے سے زائد کی معاشی سرگرمیاں ہونے کی توقع ہے، الیکشن کے باعث مزدوروں اور بے روزگاروں کیلئے روزگار کے مواقع پیدا ہوئے ہیں۔ امیدواروں کی جانب سے مختلف مزاروں پر لنگر ،غریبوں میں کھانے کی تقسیم اور انتخابی دفاتر میں ووٹرز کی مشروبا ت اور کھانوں سے تواضع کے باعث ان کاروبار سے وابستہ افراد کیلئے معاشی مواقع پیدا ہوئے ہیں۔

قومی اسمبلی کی نشستوں پر 3459 اور صوبائی اسمبلیوں کی جنرل نشستوں پر 6288 امیدواروں میں براہ راست مقابلہ ہوگا۔ قومی اسمبلی کے امیدوار کیلئے انتخابی اخراجا ت کی حد 40 لاکھ مقرر ہے اس طرح قومی اسمبلی کے امیدواروں کے اخراجات کا تخمینہ 13 ارب 83 کروڑ 60 لاکھ روپے لگایا گیا ہے۔ صوبائی امیدوار کے لیے انتخابی اخراجات کی حد 20 لاکھ روپے مقرر ہے۔ اس طرح چاروں صوبائی اسمبلیوں کے امیدواروں کے مجموعی اخراجات کا تخمینہ 12 ارب 57 کروڑ 60 لاکھ روپے لگایا گیا ہے۔