کراچی: (دنیا نیوز) پاکستان پٹرولیم ڈیلرز ایسوسی ایشن نے ڈی ریگولیٹ پر خدشات کا اظہار کرتے ہوئے حکومت کا مقابلہ کرنے کا اعلان کر دیا۔
پریس کانفرنس کرتے ہوئے چیئرمین پاکستان پٹرولیم ڈیلرز عبد السمیع خان نے کہا کہ ڈی ریگولیشن فارمولے کے نفاذ کیلئے دھمکیاں موصول ہوئی تھیں، پٹرولیم سمگلنگ کی وجہ سے ملک میں ڈی ریگولیٹ فارمولا کامیاب نہیں ہوسکتا۔
عبد السمیع خان نے کہا کہ مصدق ملک کی بنائی ہوئی ڈی ریگولیٹ پالیسی ظلم کے مترادف ہے، مصدق ملک کو خط لکھ دیا ہے دو دن انتظار کریں گے اس کے بعد لائحہ عمل کا اعلان ہوگا۔
چیئرمین پاکستان پٹرولیم ڈیلرز نے کہا کہ مصدق ملک سمجھتے نہیں ہیں پٹرولیم انڈسٹری کیا ہے، مصدق ملک کی جگہ پٹرولیم کا تجربہ رکھنے والے قابل آدمی کو وزارت کی ذمہ داری سونپی جائے۔
عبد السمیع نے کہا کہ مصدق ملک نے پٹرولیم ڈیلرز سے ڈی ریگولیٹ فریم ورک پر تاحال کوئی مشاورت نہیں کی، ڈی ریگولیشن فارمولے کے بعد پٹرولیم ڈیلرز کا پرافٹ مارجن حکومت کو کھٹکے گا۔
