قطر کا پاکستان میں 3 ارب ڈالر سرمایہ کاری کے عزم کا اعادہ، معاہدوں پر دستخط

Published On 23 October,2025 07:25 pm

اسلام آباد: (دنیا نیوز) قطر کی جانب سے پاکستان میں 3 ارب ڈالر سرمایہ کاری کے عزم کا اعادہ، معاہدوں پر دستخط ہو گئے۔

وفاقی دارالحکومت میں پاکستان اور قطر کے درمیان چھٹے مشترکہ وزارتی کمیشن (جے ایم سی) کا اجلاس منعقد ہوا، جس کی صدارت وزیرِ تجارت جام کمال خان اور قطری وزیرِ تجارت شیخ فیصل بن ثانی نے کی۔

اجلاس میں دونوں ممالک کے درمیان اقتصادی اور تکنیکی تعاون کے فروغ کے لیے کئی اہم فیصلے کیے گئے۔

وزارتِ اقتصادی امور کی جانب سے جاری بیان کے مطابق، پاکستان اور قطر کے درمیان اقتصادی و تکنیکی تعاون سے متعلق متعدد پروٹوکولز پر دستخط ہوئے جبکہ قطر نے پاکستان میں 3 ارب ڈالر کی سرمایہ کاری کے عزم کا اعادہ کیا۔

ترجمان اقتصادی امور کے مطابق ایس آئی ایف سی (سپیشل انویسٹمنٹ فسیلیٹیشن کونسل) اور قطر انویسٹمنٹ اتھارٹی کے درمیان براہِ راست روابط کو مزید مضبوط بنانے پر اتفاق کیا گیا، اس کے ساتھ ساتھ ثقافت اور میڈیا کے شعبے میں ’’ایئر آف کلچر‘‘ پروگرام شروع کرنے پر بھی اتفاق ہوا۔

اجلاس میں فلم، ڈراما اور ثقافتی پروگراموں کی مشترکہ پروڈکشن کو فروغ دینے کی حوصلہ افزائی کی گئی جبکہ ٹرانسپورٹ کے شعبے میں برقی، خودکار اور ہائیڈروجن گاڑیوں کی ٹیکنالوجی پر تعاون بڑھانے پر بھی اتفاق ہوا۔

موٹروے اور دیگر انفراسٹرکچر منصوبوں میں قطری سرمایہ کاری کے امکانات پر بھی تفصیلی غور کیا گیا، مزید یہ طے پایا کہ پاکستان اور قطر کی ایوی ایشن اتھارٹیز کے درمیان جلد ایک مشاورتی اجلاس منعقد کیا جائے گا۔

اجلاس میں تعلیم و تربیت کے شعبے میں تعاون بڑھانے کے لیے ایک ایگزیکٹو پروگرام تیار کرنے پر بھی اتفاق کیا گیا۔

ترجمان نے مزید بتایا کہ قطر سائنس اینڈ ٹیکنالوجی پارک اور سپیشل ٹیکنالوجی زونز اتھارٹی کے درمیان شراکت داری پر زور دیا گیا جبکہ قطر میں ہنرمند پاکستانیوں کی تعیناتی کے لیے نئے لیبر ایم او یو (مفاہمتی یادداشت) کی تیاری پر بات چیت ہوئی۔