اسلام آباد:(دنیا نیوز) وزیراعظم شہباز شریف کے انرجی سکیورٹی اور مقامی ذخائر کی ڈیویلپمنٹ ویژن کے عین مطابق 20 سال بعد پاکستان کے آف شور تیل و گیس ذخائر میں بڑی کامیابی مل گئی۔
ڈیویلپمنٹ ویژن کے اعلامیہ کے مطابق دو دہائیوں بعد سمندر میں تیل و گیس کی دریافت کی کامیاب بولیاں ہوئی ہیں،لائسنز کے پہلے فیز میں پاکستانی سمندر میں تیل و گیس دریافت میں تقریباً 80 ملین امریکی ڈالر کی سرمایہ کاری ہو گی۔
اعلامیہ میں بتایا گیا کہ ڈرلنگ کے دوران یہ سرمایہ کاری ایک بلین امریکی ڈالر تک بڑھنے کا امکان ہے ،آف شور میں تیل و گیس کی 23 بلاکس کی کامیاب بولیاں موصول ہوئی ہیں، کامیاب بڈنگ راؤنڈ پاکستانی معیشت کے لیے بہترین ثابت ہو گا۔
ڈیویلپمنٹ ویژن کے اعلامیہ میں کہا گیا کہ انڈس اور مکران بیسن میں بیک وقت ایکسپلوریشن کی سٹریٹیجی پاکستان کے لیے کامیاب رہی ،کامیاب بولیاں تقریباً 53,510 مربع کلومیٹر کا رقبہ پر مشتمل ہیں،کامیاب بڈنگ راؤنڈ پاکستان کے اپ اسٹریم سیکٹر میں سرمایہ کاروں کے مضبوط اعتماد کا ثبوت ہے۔
اسی طرح امریکی ادارے ڈیگلیور اینڈ میکناٹن نےحالیہ بیسن سٹڈی کے دوران پاکستان کے سمندر میں 100 ٹریلین کیوبک فٹ کے ممکنہ ذخائر کا اندئیہ دیا تھا، اسی ممکنہ پوٹینشل کی بنا پر آف شور راؤنڈ 2025 لانچ کیا گیا جس میں کامیابی ملی،اہم بین الاقوامی اور پرائیوٹ کمپنیاں پاکستان کے سمندر میں تیل و گیس کی دریافت کریں گے۔
اعلامیہ میں مزید بتایا گیا کہ ترکی پٹرولیم، یونائیٹڈ انرجی، اورینٹ پٹرولیم، اور فاطمہ پٹرولیم، بھی جوائنٹ وینچر شراکت دار کے طور پر شامل ہوئے ہیں، کامیاب بڈرز میں پاکستان کی معروف کمپنیاں او جی ڈی سی ایل، پی پی ایل، ماری انرجیز اور پرائم انرجی شامل ہیں، پاکستان کے آف شور پوٹینشل میں بڑھتی ہوئی بین الاقوامی دلچسپی کی عکاس کرتی ہے۔
