کراچی: (ویب ڈیسک) پاکستان کرکٹ ٹیم کے کپتان بابراعظم نے کہا ہے کہ انگلینڈ کے خلاف کراچی ٹیسٹ جیتنے کی بھرپور کوشش کریں گے۔
کراچی میں پریس کانفرنس کرتے ہوئے کپتان بابراعظم نے کہا کہ فائنل الیون کے حوالے سے آج رات فیصلہ کریں گے تاہم نیشنل سٹیڈیم کی پچ سپنرز کے لئے سازگار ہے، اپنی غلطیوں سے اجتناب برتنے کی کوشش کریں گے۔
انہوں نے کہا کہ امام الحق انجری کے باعث کراچی ٹیسٹ میچ میں شرکت نہیں کریں گے، انہیں ہمسٹرنگ کا ایشو ہے، کھلاڑی مسلسل کرکٹ کھیل رہے ہیں جس کی وجہ سے انجریر ہورہی ہیں، ایک دو روز آرام ملتا ہے جو کہ کم ہے۔
قومی ٹیم کے کپتان بابراعظم نے اظہر علی کو شاندار کیریئر پر مبارکباد دیتے ہوئے کہا کہ اظہر علی نے پاکستان کے لئے کافی پرفارمنسس دی ہیں، اظہر علی نے آغاز میں ہمیں بہت سپورٹ کیا، اظہر علی ہمارے لئے ایک مثال رہے ہیں، ان کے تجربے سے فائدہ اٹھانے کی کوشش کرتے ہیں۔
بابراعظم نے مزید کہا کہ ٹیسٹ کرکٹ کو سیشن ٹو سیشن لے کر چلنا پڑتا ہے، ہم ٹیسٹ کرکٹ میں مشکلات کا شکار ہیں، مسلسل انجریز کی وجہ سے ہم کمبینیشن نہیں بنا پا رہے، پچھلے دونوں میچز ہاتھ میں تھے لیکن اس کے باوجود شکست ہوئی۔
کراچی ٹیسٹ کے پلان کے حوالے سے کپتان قومی ٹیم کا کہنا تھا کہ ہمارا پلان سیدھا سا ہے کہ ہم اپنے طریقے سے کھیلیں گے، ہمارا کام ہے اپنے پلان کے مطابق کھیلنا ہے، کراچی کی وکٹ جیسی ہوتی ہے ویسی ہی ہے، نیشنل اسٹیڈیم کی وکٹ خشک ہے، پہلے جو غلطیاں کیں اس کو بہتر کرنے کی کوشش کریں گے۔
