لاہور: (دنیا نیوز) قذافی سٹیڈیم اپ گریڈیشن پراجیکٹ پر کام تیز، مجموعی طور پر 60 فیصد منصوبہ مکمل ہو گیا، فلورز کا کام آخری مرحلے میں داخل، نئی نشستوں کے سٹرکچر کی تعمیر بھی شروع ہو گئی۔
چیئرمین پاکستان کرکٹ بورڈ محسن نقوی نے قذافی سٹیڈیم کا تفصیلی دورہ کیا، چیئرمین پی سی بی محسن نقوی نے پراجیکٹ پر پیش رفت کا جائزہ لیا، چیئرمین پی سی بی محسن نقوی نے مین بلڈنگ انکلوژرز میں جاری تعمیراتی کاموں کا معائنہ کیا۔
محسن نقوی نے نئی لائٹس کی تنصیب کے کام کا معائنہ کیا، چیئرمین پی سی بی نے فلورز پر جاری تعمیراتی کاموں کا مشاہدہ کیا، تیار کردہ کمروں کا معائنہ کیا۔
چیئرمین پی سی بی نے منصوبے کی پیش رفت پر اطمینان کا اظہار کرتے ہوئے کہا کہ تعمیراتی کاموں میں اعلیٰ معیار کو ہر صورت یقینی بنایا جائے، چیمپئنز ٹرافی ٹورنامنٹ سے قبل پراجیکٹ کو ہر قیمت پر مکمل کیا جائے گا۔
انہوں نے کہا کہ پوری ٹیم محنت سے کام کر رہی ہے، پراجیکٹ تیزی سے آگے بڑھ رہا ہے، منصوبے پر پیش رفت کی خود نگرانی کر رہا ہوں، محسن نقوی نے منصوبے کی بروقت تکمیل کے لیے متعلقہ حکام کو ہدایات دیں۔
ایف ڈبلیو او کے پراجیکٹ ڈائریکٹر نے منصوبے پر ہونے والی پیش رفت کے بارے میں بریفنگ دی۔
ایڈوائزر عامر میر، بلال افضل، چیف آپریٹنگ آفیسر سید سمیر احمد، ڈائریکٹرز انفراسٹرکچر، ڈومیسٹک کرکٹ، نیسپاک، ایف ڈبلیو او کے حکام بھی اس موقع پر موجود تھے۔
