پاکستان کو تیسرے ون ڈے میں بھی شکست، نیوزی لینڈ کا وائٹ واش

ماؤنٹ مونگانوئی: (ویب ڈیسک) نیوزی لینڈ نے تیسرے ون ڈے میں بھی پاکستان کو 43 رنز سے شکست دے کر تین میچوں کی سیریز میں وائٹ واش کر دیا۔

میزبان نیوزی لینڈ اور پاکستان کے درمیان سیریز کا آخری میچ ماؤنٹ مونگانوئی میں کھیلا گیا، میچ سے قبل ہونے والی بارش کے باعث میدان کا آؤٹ فیلڈ گیلا ہوگیا تھا جس کی وجہ سے ٹاس تاخیر کا شکار ہوا، ٹاس میں تاخیر ہونے کی وجہ سے تیسرے ون ڈے میچ کو 42 اوورز تک محدود کر دیا گیا، قومی ٹیم میں ایک تبدیلی کی گئی، حارث رؤف کی جگہ نسیم شاہ کو ٹیم میں شامل کیا گیا۔

نیوزی لینڈ اننگز

میزبان ٹیم نے پہلے کھیلتے ہوئے مقررہ 42 اوورز میں 8 وکٹ کے نقصان پر 264 رنز بنائے، کپتان بریسویل نے 40 بالز پر 58 رنز کی برق رفتار اننگز کھیلی۔

نیوزی لینڈ کی ٹیم کی پہلی وکٹ 13 رنز پر گر گئی، نائیک کیلے 3 رنز بنا کر آؤٹ ہوگئے، رائس ماریو نے 58 رنز کی اننگز کھیلی، ڈیرل مچل 43 اور ہنری نکولس 31 رنز بنا کر پویلین لوٹ گئے، ٹم سائفرٹ نے 26 رنز بنائے، محمد عباس 11 اور مچل ہے 8 رنز بنا کر پویلین لوٹے۔

پاکستان کی جانب سے عاکف جاوید نے 4 وکٹیں حاصل کیں، نسیم شاہ 2، فہیم اشرف اور سفیان مقیم نے 1،1 کھلاڑی کو آؤٹ کیا۔

پاکستانی اننگز

ہدف کے تعاقب میں پاکستانی ٹیم 40 اوورز میں 221 رنز بنا کر آؤٹ ہوگئی، پاکستان کی پہلی وکٹ 73 رنز پر گر گئی، عبداللہ شفیق 33 سکور بنا کر پویلین لوٹ گئے، امام الحق چہرے پر گیند لگنے کے باعث ریٹائرڈ ہرٹ ہوئے، ان کی جگہ بیٹنگ کرنے والے عثمان خان بھی زیادہ دیر وکٹ پر نہ ٹھہر سکے اور 12 رنز بنا کر آؤٹ ہوگئے۔

بابراعظم نے 58 گیندوں پر 50 رنز کی اننگز کھیلی، سلمان آغا 11 رنز بنا کر آؤٹ ہوگئے، کپتان محمد رضوان 37 ، طیب طاہر 33، نسیم شاہ 17، فہیم اشرف 3، سفیان مقیم 2 جبکہ محمد وسیم بغیر کھاتہ کھولے پویلین لوٹ گئے۔

نیوزی لینڈ کی جانب سے بین سیئرز نے 5، جیکب ڈفی 2 جبکہ محمد عباس اور ڈیرل مچل نے ایک ایک وکٹ حاصل کی۔