لاہور: (دنیا نیوز) شمالی چھاؤنی میں گھریلو ملازمہ نومولود بچے پر تشدد کرنے کے بعد گھر سے چوری کر کے فرار ہو گئی۔
3 ماہ کی بچی پر تشدد کی فوٹیج بھی سامنے آ گئی، فوٹیج میں دیکھا جا سکتا ہے کہ ملزمہ صائمہ نے تین ماہ کے بچے کو منہ پر کپڑا رکھ کر مارنے کی کوشش کی، فوٹیج میں ملازمہ کو بچی پر تشدد کرتے ہوئے دیکھا جا سکتا ہے۔
ملزمہ اڑھائی لاکھ سے زائد مالیت کے زیورات و رقم چوری کرکے فرار ہوئی، بچے کے منہ پر کپڑا رکھ کر تشدد کرنے کا پتہ سی سی ٹی وی سے چلا۔
ایس پی کینٹ اویس شفیق کے مطابق ملازمہ کو تین ماہ قبل 26 ہزار ماہانہ پر گھر میں رکھا گیا، اطلاع ملنے پر شمالی چھاؤنی پولیس جائے وقوعہ پر پہنچ گئی، متاثرہ شہری مطلوب ظفر کی مدعیت ملزمہ صائمہ کے خلاف فوری مقدمہ درج کر لیا گیا۔
اویس شفیق نے بتایا کہ ملزمہ کی گرفتاری کے لیے ٹیم تشکیل دے کر چھاپے مارے جا رہے ہیں، جلد گرفتار کر لیا جائیگا، بچوں پر تشدد کرنے والے اور جرائم پیشہ افراد کو کیفر کردار تک پہنچایا جائیگا۔
