لاہور: (ویب ڈیسک) خوبرو پاکستانی اداکارہ حبا بخاری اور اداکار آریز احمد نے بیٹی کی پیدائش کے 2 ماہ بعد خوشخبری مداحوں کے ساتھ شیئر کردی۔
فوٹو اینڈ ویڈیو شیئرنگ پلیٹ فارم انسٹاگرام پر اس فنکار جوڑی نے مشترکہ پوسٹ شیئر کر کے ننھی پری کی آمد کے اعلان کے ساتھ ہی نام بتا دیا اور تصویر بھی شیئر کر دی۔
انسٹا پوسٹ میں انہوں نے ایک تصویر شیئر کی ہے جس میں حبا بخاری اور آریز احمد کے ہاتھوں میں ان کی بیٹی کے پاؤں کی جھلک بھی دکھائی دی۔
پوسٹ کے کیپشن میں انہوں نے لکھا کہ ’’ اس سال نے ہماری زندگیوں کو اس خوبصورت انداز میں بدل دیا ہے، جسے الفاظ میں بیان کرنا میرے لیے واقعی ممکن نہیں، یہ آپ کا دوسرا مہینہ ہے‘‘۔
حبا بخاری نے لکھا کہ ’’ آپ کی موجودگی محبت کی خالص ترین شکل ہے جسے ہم نے محسوس کیا۔ اللّٰہ کا شکر ہے کہ اُس نے ہمیں اپنی رحمت سے نوازا، ہمارا چھوٹا فرشتہ‘‘۔
اداکارہ نے بیٹی کا نام مداحوں کو بتایا اور لکھا کہ ’’ آپ ہماری زندگیوں میں روشنی لائی ہیں اس لئے ہم نے آپ کا نام عینور رکھا ہے، جس کا مطلب ہے چاندنی‘‘۔
واضح رہے کہ آریز احمد اور حبا بخاری 2022ء میں شادی کے بندھن میں بندھے تھے اور یہ ان کے ہاں پہلے بچے کی پیدائش ہوئی ہے۔
