اچھے سکرپٹ نہ ہونے کی وجہ سے سکرین سے دور ہوں: یاسرہ رضوی

لاہور: (دنیا نیوز) پاکستان شوبز انڈسٹری کی معروف اداکارہ، پروڈیوسر اور لکھاری یاسرہ رضوی نے سکرین سے دوری اختیار کرنے کی وجہ بتا دی۔

حال ہی میں یاسرہ رضوی "دنیا نیوز" کے مقبول ترین مزاحیہ پروگرام "مذاق رات" میں بطور مہمان شریک ہوئیں جہاں انہوں نے پاکستانی ڈراموں کی کہانیوں پر بات کرتے ہوئے کہا کہ مجھے تو ایک طویل عرصے سے پاکستان ٹیلی ویژن پر دکھائے جانے والے ڈراموں کی کہانیاں سمجھ نہیں آرہیں۔

انہوں نے ماضی کے ڈراموں کا ذکر کرتے ہوئے کہا کہ میں کلاسیکل پاکستانی ڈرامے دیکھتی تھی اور شاید اب ان کا رواج نہیں رہا، اب ویسے ڈراموں کی کہانیاں نظر نہیں آتیں، ایسا نہیں ہے کہ لوگوں کو معیاری کام کرنا نہیں آتا، بس آج کل ماضی جیسے ڈرامے نہیں بنتے۔

اداکارہ نے کہا کہ میں نے ایک طویل عرصے تک ٹی وی پر بہت محنت سے بہت زیادہ کام کیا۔

انہوں نے ڈراموں اور سکرین سے دوری اختیار کرنے کی وجہ پر بات کرتے ہوئے کہا کہ شاید آج کل کے ڈراموں کی کہانیاں بھی ایک وجہ ہیں کہ میں کام نہیں کر رہی تاہم دوسری وجہ میرا گھر اور میرا بچہ ہے۔

ان کا اپنے ساڑھے تین سال کے بیٹے کا ذکر کرتے ہوئے کہنا تھا کہ میرا بیٹا ابھی بہت چھوٹا ہے اسے میری توجہ اور پیار کی ضرورت ہے، میری زندگی اب مستحکم ہو چکی ہے اس لیے 13، 14 گھنٹے گھر سے باہر رہ کر کام کرنے کی ضرورت نہیں۔

ممتا کے جذبے سے سرشار اداکارہ کا کہنا تھا کہ مجھے اپنے بچے کے قریب رہنا، اس کا خیال رکھنا اور اسے میسر ہونا اچھا لگتا ہے۔

غیر روایتی کردار کی آفر کے حوالے سے ان کا کہنا تھا کہ اگر میرے مزاج کے مطابق کوئی کردار ملا تو ضرور کروں گی تاہم مجھے شوٹ کے لیے صرف دو دن کی اجازت ہے۔

بعدازاں انہوں نے ہنستے ہوئے کہا کہ میرے بیٹے نے صرف دو دن ہی کام کرنے کی اجازت دی ہے۔

انہوں نے شاعری کرنے کے لیے دل ٹوٹنے کی ضرورت پر بات کرتے ہوئے انکشاف کیا کہ بہت سے لوگ اچھی شاعری کرنے کے لیے دل تڑواتے ہیں علاوہ ازیں ان سے شاعری نہیں ہو پاتی۔

اداکارہ نے بتایا کہ ان کا دل ایک نہیں متعدد مرتبہ ٹوٹ چکا ہے لیکن اس کی واحد وجہ عشق یا محبت نہیں تھی، دل ٹوٹنے کے بعد واپس جڑتا نہیں تاہم اس کے ارتقا کا سفر جاری رہتا ہے۔

انہوں نے کہا کہ مجھے لگتا ہے زندگی مسلسل درد سمیٹنے، اس سے ابھرنے اور پھر اگلے درد کے لیے تیار ہونے کا نام ہے۔

محبت کے حوالے سے بات کرتے ہوئے ان کا کہنا تھا کہ یک طرفہ محبت انسان کو اس کی اوقات بتاتی ہے کہ دنیا میں سب کچھ ہماری منشا کے مطابق نہیں ہو سکتا۔