کراچی: (ویب ڈیسک) اداکارہ ہانیہ عامر سوشل میڈیا پر اپنے مداحوں سے جڑی رہتی ہیں اور ان کے مداحوں میں دنیا کے تقریباً تمام ہی علاقوں اور مذاہب کے ماننے والے شامل ہیں۔
ہانیہ عامر نے انسٹاگرام پر اپنی ایک تصویر شیئر کرتے ہوئے ہولی تہوار کی مبارک باد دی جس میں انہوں نے ماتھے پر بندیا لگائی ہوئی ہے، تصویر کے کیپشن پر ہانیہ عامر نے لکھا کہ ایک عقل مند آدمی نے ایک بار کہا تھا کہ کوئی برائی سنو نہ کوئی برائی دیکھو، اس لئے میں برا نہیں بولتی، ’ہولی‘ کا جشن منانے والوں کو مبارک ہو۔
تصاویر میں ہانیہ عامر کے ساتھ دو اور خواتین بھی ساتھ ہیں اور ان کے ماتھے پر بھی بندیا لگی ہوئی ہے تاہم ہانیہ عامر کا انداز مداحوں کو ایک آنکھ نہ بھایا، ایک صارف نے کمنٹ میں پوچھا کہ آخری بار نماز کب پڑھی تھی؟
ایک اور صارف نے بندیا لگانے پر اعتراض کرتے ہوئے لکھا کہ ہندوؤں کے کلچر میں گھسنے کی کیا ضرورت ہے، کسی نے ہانیہ عامر کی اس پوسٹ کو زیادہ سے زیادہ کمنٹس اور ویوز جمع کرنے کی سوچی سمجھی واردات قرار دیا۔
صارفین نے کمنٹس میں اس بات کا بھی اظہار کیا کہ اب ہانیہ عامر کی پوسٹیں ناقابل برداشت ہوتی جا رہی ہیں اس لئے ان فالو کردینا زیادہ بہتر ہے، تاہم کچھ صارفین نے ہانیہ عامر کی حمایت کرتے ہوئے کہا کہ بندیا کا تعلق کسی مذہب سے نہیں ہوتا یہ علاقائی کلچر ہے۔
ایک صارف نے لکھا کہ ہمیں ایک دوسرے کی مذہبی رسومات میں شرکت کرنی چاہئے تاکہ دوریاں مٹ سکیں۔
یاد رہے کہ دنیا بھر میں ہندو مذہب کا تہوار ہولی روایتی انداز میں منایا جا رہا ہے جس کے لئے تقریبات کا انعقاد کیا گیا اور ایک دوسرے پر رنگ پھینکے گئے۔
