لاہور: (ویب ڈیسک) معروف پاکستانی اداکار میکال ذوالفقار کو مداح نے رمضان ٹرانسمیشن کےد وران دوسری شادی کی پیشکش کردی۔
میکال ذوالفقار حال ہی میں نجی ٹی وی کی رمضان ٹرانسمیشن میں بطور مہمان شریک ہوئے جہاں ارم نامی ایک مداح نے کال کی اور لائیو شو کے دوران اداکار سے محبت کا اظہار کر ڈالا۔
خاتون مداح نے کال پر میزبان ندا یاسر سے مخاطب ہوتے ہوئے کہا کہ السلام و علیکم! آج آپ نے اپنے شو میں میکال ذوالفقار کو مدعو کیا ہے، میں انہیں بہت پسند کرتی ہوں، ان کی مداح ہوں اور ان سے شادی کرنا چاہتی ہوں لیکن مجھے یہ نہیں معلوم کہ یہ کیسے ممکن ہو سکے گا۔
خاتون مداح نے مزید کہا کہ براہ مہربانی مجھے بتائیں کہ مجھے اداکار سے شادی کرنے کے لیے کیا کرنا چاہیے کیونکہ میں واقعی ان سے شادی کرنا چاہتی ہوں۔
ندا یاسر نے لائیو شو میں غیر متوقع کال موصول ہونے پر میکال ذوالفقار سے جواب دینے کو کہا۔
میکال ذوالفقار نے مداح سے مخاطب ہوتے ہوئے کہا کہ ایسی بات فون پر نہیں کرنی چاہیے، جب میں آپ سے ملوں گا تو میں اس بات کا جواب دوں گا لیکن میں اتنی محبت ملنے پر خوش ہوں۔
دوسری جانب ندا یاسر نے مداحوں سے اپنے جذبات پر قابو رکھنے اور رمضان ٹرانسمیشن میں اس طرح کی باتیں کرنے سے گریز کرنے کی درخواست کی۔
